भुसावळ – विद्यार्थ्यांचे मानसिक स्वास्थ्य जपले जावे आणि त्यांचे अध्ययन अधिक परिणामकारक व्हावे, या उद्देशाने भुसावळ येथील उसामा उर्दू हायस्कूल व ज्युनियर कॉलेज येथे “आनंददायी शनिवार” हा उपक्रम राबविण्यात आला. या उपक्रमात इयत्ता पाचवी ते आठवीच्या विद्यार्थ्यांनी उत्साहाने सहभाग घेतला.
उपक्रमांतर्गत विद्यार्थ्यांसाठी योगासने, मैदानी खेळ, अवांतर वाचन, जीवनकौशल्य विकास, ध्यान तसेच कलात्मक क्रियांचे आयोजन करण्यात आले. चित्रकला, हस्तकला आणि अभिनय अशा कलात्मक उपक्रमांमधून विद्यार्थ्यांनी आपली सृजनशीलता व्यक्त केली.
‘एक दिवस बांधावर’ या विशेष उपक्रमातून विद्यार्थ्यांना शेतीचे महत्त्व समजावून सांगण्यात आले. यावेळी श्री. नासीर हुसेन सर यांनी विद्यार्थ्यांना ग्रामीण जीवन, शेती आणि पर्यावरण याबद्दल उपयुक्त माहिती दिली.
कार्यक्रमाच्या प्रस्तावनेत श्री. शेख यामीन सर यांनी विद्यार्थ्यांमध्ये सहकार्य वृत्ती, नेतृत्व गुण, नैतिक मूल्ये आणि जबाबदारीची भावना विकसित करण्याचे महत्त्व स्पष्ट केले. त्यांनी सांगितले की, “नवीन राष्ट्रीय शैक्षणिक धोरणानुसार विद्यार्थ्यांमध्ये करुणा, सहानुभूती, साहस आणि सर्जनशीलतेचा विकास व्हावा, हा मुख्य हेतू आहे.”
शाळेचे मुख्याध्यापक श्री. सय्यद नवीद अख्तर यांनी सांगितले की, “या उपक्रमामुळे विद्यार्थ्यांचे शारीरिक आणि मानसिक आरोग्य सुधारते तसेच जीवनावश्यक कौशल्यांचा विकास होतो.”
या उपक्रमाच्या यशस्वीतेसाठी श्री. शेख रफीक सर, श्री. नविद खान आणि इतर शिक्षकवर्ग यांनी मोलाचे योगदान दिले.
