चोपडा – चोपडा तालुक्यातील मामलदे फाट्याजवळ बुधवारी (दि. १६ ऑक्टोबर) सायंकाळी झालेल्या भीषण अपघातात दोन तरुण मित्रांचा जागीच मृत्यू झाला. यामाहा स्पोर्ट्स बाईकवरील नियंत्रण सुटल्याने बाईक झाडावर आदळली आणि दुर्दैवी घटना घडली. या अपघातामुळे परिसरात शोककळा पसरली आहे.
मृतांमध्ये मामलदे येथील अमोल ज्ञानेश्वर पाटील (२५) आणि पृथ्वीराज चंद्रकांत पाटील (२३) या दोघांचा समावेश आहे. दोघे एकाच दुचाकीवरून मामलदेहून चोपड्याकडे येत होते. मामलदे फाट्याजवळ पोहोचताच बाईकवरील ताबा सुटल्याने ती झाडावर जोरदार आदळली. दोघेही गंभीर जखमी होऊन जागीच ठार झाले.
अपघातानंतर नातेवाईकांनी तत्काळ चोपडा उपजिल्हा रुग्णालयात नेले, मात्र वैद्यकीय अधिकारी डॉ. स्वप्ना पाटील यांनी तपासल्यानंतर दोघांनाही मृत घोषित केले. यामुळे रुग्णालयात हृदयद्रावक वातावरण निर्माण झाले.
मयत पृथ्वीराज पाटील हा सुरत येथे कापड व्यवसायात कार्यरत होता. दसऱ्याच्या निमित्ताने तो नुकताच घरी आला होता. त्याने अलीकडेच नवीन यामाहा स्पोर्ट्स बाईक खरेदी केली होती. तर अमोल पाटील हा बियाणे कंपनीत नोकरीला होता आणि त्याचे लग्न ठरले होते. लग्नाच्या तयारीत असतानाच हा अनर्थ ओढवला.
दोघेही आपल्या कुटुंबातील एकुलते एक असल्याने त्यांच्या घरावर दुःखाचा डोंगर कोसळला आहे. पृथ्वीराज सोशल मीडियावर ‘रील्स स्टार’ म्हणून ओळखला जात होता. त्यांच्या पश्चात आई-वडील व एक बहिण असा परिवार आहे.
अपघाताची माहिती मिळताच आ. प्रा. चंद्रकांत सोनवणे यांनी रुग्णालयात भेट देऊन नातेवाईकांचे सांत्वन केले. तसेच अरुणभाई गुजराथी, कैलास पाटील, नरेंद्र पाटील, शशिकांत पाटील, देवेंद्र पाटील, शुभम चौधरी यांसह अनेक मान्यवरांनी हजेरी लावली.
मयत दोघांवर १७ ऑक्टोबर रोजी मामलदे येथे अंत्यसंस्कार करण्यात येणार असून, या घटनेमुळे मामलदे आणि चोपडा तालुक्यात हळहळ व्यक्त होत आहे.
