तमिळनाडू – दिल्लीतील स्फोटाच्या घटनेनंतर अजून देश सावरत असतानाच तमिळनाडूमधून आणखी एक भीषण अपघाताची बातमी समोर आली आहे. सिलिंडर घेऊन जाणारा ट्रक महामार्गावर उलटल्यानंतर एकामागोमाग एक सिलिंडरचे स्फोट होऊन परिसर हादरला. या भीषण स्फोटामुळे दोन किलोमीटरपर्यंतचा परिसर थरथरला असून आसपासच्या गावांमध्ये भीतीचे वातावरण निर्माण झाले आहे.
घटना कशी घडली
मिळालेल्या माहितीनुसार, ही घटना आज सकाळी अरियालूर जिल्ह्यातील वरनवासी गावाजवळ घडली. महामार्गावर एका वळणावर ट्रक चालकाचे नियंत्रण सुटले आणि ट्रक रस्त्याच्या कडेला असलेल्या नाल्यात उलटला.
यामुळे ट्रकमधील गॅस सिलिंडर एकमेकांवर आदळले आणि अचानक भडका उडाला. काही क्षणांतच एकापाठोपाठ अनेक सिलिंडरचे स्फोट झाले आणि संपूर्ण ट्रक आगीच्या भक्ष्यस्थानी सापडला.
चालक गंभीर जखमी, पण जीव वाचला
सुदैवाने चालकाने वेळीच ट्रकमधून उडी मारल्याने त्याचा जीव वाचला, मात्र तो गंभीर जखमी झाला आहे. त्याला अरियालूर सरकारी वैद्यकीय महाविद्यालयात उपचारासाठी दाखल करण्यात आले आहे.
परिसरात भीतीचं वातावरण
स्फोटाचे आवाज इतके प्रचंड होते की जवळपासच्या गावांतील घरांच्या काचा फुटल्या आणि नागरिकांनी घाबरून घराबाहेर धाव घेतली.
परिसरात दाट धुराचे लोट पसरले होते आणि जमिनीसुद्धा हादरल्यासारखी जाणवत होती. लहानांपासून ते वृद्धांपर्यंत सर्वच जण या घटनेने भयभीत झाले होते.
अग्निशमन दलाचे शौर्य
घटनास्थळी अरियालूर अग्निशमन आणि बचाव सेवांच्या अनेक पथकांनी धाव घेतली.
आग विझवण्यासाठी जवानांना जवळपास एक तासाहून अधिक काळ झुंज द्यावी लागली. अखेर आग आटोक्यात आणण्यात यश आलं, मात्र ट्रक पूर्णपणे जळून खाक झाला.
अग्निशमन अधिकाऱ्यांनी सांगितले की,“आग वेळेत विझवली नसती, तर ती जवळच्या वस्त्यांपर्यंत पसरली असती आणि मोठं नुकसान झालं असतं.”
वाहतूक कोंडी आणि तपास सुरू या अपघातानंतर महामार्गावरील वाहतूक काही काळ विस्कळीत झाली होती. पोलिसांनी तातडीने वाहतूक नियंत्रणात आणत ट्रकचा अवशेष हटवण्याचे काम सुरू केले आहे.
या घटनेचा पुढील तपास सुरू असून, सिलिंडर ट्रकच्या सुरक्षेसंबंधी नियमांचे उल्लंघन झाले का, याचा तपास अधिकारी करत आहेत.
