जळगाव – महाराष्ट्रात कडाक्याची थंडी ओसरत असून वातावरणात बदल जाणवू लागला आहे. राज्यात पावसाला पोषक हवामान तयार झाल्याने अनेक ठिकाणी ढगाळ वातावरण आहे. जळगावमध्ये काही दिवसांपूर्वी ७ अंशांवर घसरलेले किमान तापमान आता १४ अंशांच्या वर गेले आहे. तर कमाल तापमान तिशीपार पोहोचले असून दुपारी उकाड्याची तीव्रता वाढत आहे.
जळगावसह जिल्ह्यात गेल्या आठवड्यात थंडीचा जोर वाढला होता. मात्र अलीकडच्या दिवसांत तापमानातील वाढ स्पष्टपणे जाणवत आहे. बंगालच्या उपसागरात कमी दाबाचा पट्टा तयार होऊन तो पुढे चक्रीवादळात परिवर्तित होण्याची शक्यता हवामान विभागाने वर्तवली आहे. याचा अप्रत्यक्ष परिणाम महाराष्ट्राच्या हवामानावर होतो आहे. त्यामुळे थंडी कमी होऊन ढगाळ वातावरण आणि दुपारी वाढणारा उकाडा अशी परिस्थिती निर्माण झाली आहे.
हवामानातील या बदलामुळे सर्दी, खोकला आणि व्हायरल इन्फेक्शन वाढल्याचे आरोग्य विभागाकडून सांगण्यात येत असून नागरिकांना सावधगिरी बाळगण्याचे आवाहन करण्यात आले आहे. पुढील काही दिवस हवामान अशीच स्थिती राहणार असल्याचेही निरीक्षण नोंदवण्यात आले आहे. ऐन हिवाळ्यात पावसाला पोषक परिस्थिती निर्माण झाल्याने नागरिक हैराण आहेत.
राज्यात कोणत्या जिल्ह्यांत पावसाची शक्यता?
हवामान विभागानुसार आज खालील जिल्ह्यांमध्ये ढगाळ वातावरणासह विजा आणि हलक्या पावसाची शक्यता आहे:
ठाणे, मुंबई, रायगड, रत्नागिरी, सिंधुदुर्ग, सांगली, कोल्हापूर, राज्यात थंडी कमी होत असताना अचानक वाढलेला उकाडा आणि संभाव्य हलका पाऊस यामुळे हवामानात मोठी उलथापालथ पाहायला मिळत आहे.
