मुंबई – बॉलीवूडचे दिग्गज अभिनेते आणि हिंदी सिनेमातील “ही-मॅन” म्हणून ओळखले जाणारे धर्मेंद्र यांचे निधन झाले आहे. ते ८९ वर्षांचे होते. वृत्तसंस्था IANS यांनी दिलेल्या माहितीनुसार, गेल्या काही दिवसांपासून प्रकृती अस्वस्थ असल्याने त्यांना मुंबईतील ब्रीच कँडी रुग्णालयात दाखल करण्यात आले होते. उपचार सुरू असतानाच त्यांनी आज अखेरचा श्वास घेतला.
धर्मेंद्र यांच्या प्रकृतीत सुधारणा झाल्याने १२ नोव्हेंबर रोजी त्यांना डिस्चार्ज देण्यात आला होता. घरच्या घरी उपचार सुरू असल्याचे कुटुंबीयांनी सांगितले होते. पुढील महिन्यात, ८ डिसेंबरला, ते ९० वा वाढदिवस साजरा करणार होते. त्यांच्या वाढदिवसासाठी कुटुंबीयांनी विशेष तयारीदेखील केली होती. परंतु त्याआधीच त्यांचे निधन होणे ही मोठी धक्कादायक बाब आहे.
या महिन्याच्या सुरुवातीला धर्मेंद्र रुग्णालयात दाखल झाल्यानंतर त्यांच्या निधनाबाबत खोट्या अफवा सोशल मीडियावर पसरल्या होत्या. याबाबत कुटुंबीयांनी नाराजीही व्यक्त केली होती.
धर्मेंद्र यांनी तब्बल ६५ वर्षांच्या कारकिर्दीत ३०० हून अधिक चित्रपटांमध्ये काम केले. देखणे व्यक्तिमत्त्व, अभिनयाची शैली आणि अ‍ॅक्शन भूमिकेमुळे ते हिंदी चित्रपटसृष्टीतील सर्वात लोकप्रिय अभिनेत्यांपैकी एक बनले. त्यांच्या निधनाने भारतीय चित्रपटसृष्टीने एक सुवर्णयुग गमावले आहे.
