छत्रपती संभाजीनगर – गंगापूरजवळील बाबरगाव फाटा परिसरात रविवारी दुपारी झालेल्या भीषण अपघातात दुचाकीला ट्रकची जोरदार धडक बसून चिमुकल्या बहीण-भावाचा जागेवरच मृत्यू झाला, तर त्यांचे वडील गंभीर जखमी झाले. या हृदयद्रावक अपघाताने परिसरात शोककळा पसरली आहे.
अपघातात मृत्युमुखी पडलेल्या मुलांची नावे विराट प्रदीप जाधव (वय ५) आणि खुशी प्रदीप जाधव (वय अडीच वर्षे) अशी आहेत. जखमी वडील प्रदीप जाधव (रा. शेकटा) यांच्यावर छत्रपती संभाजीनगरमधील रुग्णालयात उपचार सुरू आहेत.
अपघात कसा झाला?
शेकटा येथील प्रदीप जाधव रविवारी वैजापूर तालुक्यातील महागाव येथे लग्नकार्यासाठी गेले होते. कार्यक्रम आटोपून ते आपल्या दोन्ही मुलांसह मोटारसायकलवरून गंगापूरमार्गे शेकटा येथे परतत होते. बाबरगाव फाटा येथील जिनिंगसमोर छत्रपती संभाजीनगरकडून गंगापूरकडे येणाऱ्या ट्रकने भरधाव वेगात त्यांच्या दुचाकीला जोरदार धडक दिली.
धडक इतकी भीषण होती की दोन्ही मुलांचा जागेवरच मृत्यू झाला. वडील गंभीर जखमी अवस्थेत असल्यामुळे त्यांना तातडीने रुग्णवाहिकेतून रुग्णालयात हलवण्यात आले.
घटनास्थळी हृदयाला चटका लावणारे क्षण
अपघातानंतर महामार्गावरील स्थानिक नागरिकांनी तात्काळ घटनास्थळी धाव घेतली. मुलांचे मृतदेह पाहताच बापाचा धीर सुटला आणि तो जोरजोराने रडू लागला. हे भयावह दृश्य पाहून घटनास्थळी उपस्थित असलेल्या प्रत्येकाचे हृदय पिळवटले.ट्रक चालक फरार
अपघातानंतर ट्रक चालक वाहन घटनास्थळी सोडून पळून गेला. स्थानिकांच्या संतप्त प्रतिक्रिया पाहून त्याने पळ काढल्याचे सांगितले जाते.
गंगापूर पोलिसांनी ट्रक चालकाविरोधात गुन्हा दाखल केला असून त्याचा शोध सुरू आहे.
दोन्ही मुलांचे मृतदेह पोलिसांनी ताब्यात घेऊन पोस्टमार्टमसाठी रुग्णालयात पाठवले आहेत. पुढील तपास गंगापूर पोलीस करत आहेत.
