छत्रपती संभाजीनगरमध्ये चेन स्नॅचिंग प्रकरण उघडकीस; ‘विक्की हेल्मेट’सह दोन आरोपी पोलिसांच्या जाळ्यात

छत्रपती संभाजीनगर – छत्रपती संभाजीनगरमध्ये नशापान आणि वाढदिवसाची पार्टी साजरी करण्यासाठी पैशांची गरज भासल्याने महिलेचे मंगळसूत्र हिसकावण्याचा प्लान करणारे आरोपी अखेर पोलिसांच्या ताब्यात आले. या प्रकरणात अर्पन उर्फ चिच्या स्वप्नील डोंगरदिवे (18) आणि त्याचा साथी अमीत उर्फ बबुआ यांनी चेन स्नॅचिंग केले असून, चोरीचे सोने गहाण ठेवण्याचे काम विक्की उर्फ हेल्मेट गौतम सोनकांबळे (34) याने केले. अमीत उर्फ बबुआचा शोध पोलिसांनी सुरू ठेवला आहे.

खाक्याचा धाक बसताच कबुली

गुन्हे शाखेचे पोलीस निरीक्षक गजानन कल्याणकर यांनी दिलेल्या माहितीनुसार, 26 नोव्हेंबर रोजी दुपारी गुन्हे शाखेचे पथक गस्त घालत असताना सातारा परिसरातील चेन स्नॅचिंग प्रकरणातील संशयित आरोपी मुकुंदवाडी भागात फिरत असल्याची माहिती मिळाली. इच्छामणी हॉटेलजवळ अर्पन उर्फ चिच्या दिसताच त्याला ताब्यात घेण्यात आले. चौकशीत सुरुवातीला गोलमोल उत्तरे दिल्यानंतर पोलिसांनी धाक दाखवताच त्याने गुन्ह्याची कबुली दिली.

वाढदिवसाचा खर्च भागवण्यासाठी गुन्ह्याची आखणी

अर्पनने सांगितले की 24 नोव्हेंबर रोजी तो, विक्की उर्फ हेल्मेट, अमीत उर्फ बबुआ आणि सय्यद मतीन चौघे मिळून नशा करत होते. त्यावेळी विक्कीने पार्टीसाठी आणि मुलीच्या वाढदिवसासाठी पैसे नसल्याने चेन स्नॅचिंगचा प्लान आखला. सय्यद मतीनची दुचाकी घेऊन, नंबर प्लेट टेपने झाकून हे चौघे रात्री बाहेर पडले. सातारा परिसरात पायी चालणाऱ्या महिलेच्या गळ्यातील सोन्याची पोथ हिसकावून आरोपी पळाले. मात्र काही अंतरावर दुचाकीची वायर तुटल्याने त्यांनी वाहन रस्त्यातच सोडले आणि थेट विक्कीच्या घरी पोहोचले.

चोरी केलेले दागिने विक्रीसाठी विक्कीनेच पुढाकार घेत, मुकुंदवाडीतील भरत ज्वेलर्समध्ये “आई आजारी आहे” असा बहाणा करून ते गहाण ठेवले.

‘विक्की हेल्मेट’सह मुख्य आरोपी ताब्यात

गुन्ह्यातून मिळालेल्या 10 हजार रुपयांचा वापर आरोपींनी नशापान आणि वाढदिवस साजरा करण्यासाठी केल्याचे उघड झाले. अर्पनच्या माहितीनुसार विक्की उर्फ हेल्मेटला रेल्वे पटरीजवळून अटक करण्यात आली. भरत ज्वेलर्सचे जयेश दिलीप सोनी यांनादेखील चौकशीसाठी ताब्यात घेतले असता त्यांनी दागिने गहाण ठेवल्याची कबुली दिली. पोलिसांनी सर्व दागिने जप्त केले आहेत.

ही कारवाई गुन्हे शाखेचे अर्जुन कदम, हवालदार योगेश नवसारे, विजय निकम, योगेश गुप्ता, राजेंद्र साळुंके, श्रीकांत काळे, राजेश यदमळ आणि जालींदार गोरे, राहुल बंगाळे यांच्या पथकाने केली.