अमळनेर : शेतकऱ्यांना सरकारी योजनेच्या नावाखाली फसवणुकीचे प्रकार वाढत असताना अमळनेर तालुक्यातील एका शेतकऱ्याची शेडनेट मंजुरी मिळवून देण्याचे आमिष दाखवत तब्बल सात लाखांचे कर्ज काढून आर्थिक नुकसान केल्याची घटना उघडकीस आली आहे. ही घटना वर्ष २०२० मधील असून, आता पाच वर्षांनी याप्रकरणी दोन जणांविरुद्ध फसवणुकीचा गुन्हा दाखल करण्यात आला आहे.
गुन्हा दाखल झालेल्यांमध्ये समाधान पंडित शेलार आणि त्याचा सहकारी उद्धव कुवर यांचा समावेश आहे.
कसा झाला फसवणुकीचा प्रकार? पारोळा तालुक्यातील नेरपाट येथील शेतकरी मधुकर गरबड पाटील यांची शेती अमळनेर तालुक्यातील सडावण येथे आहे. वर्ष २०२० मध्ये त्यांनी पोखरा योजनेअंतर्गत अमळनेर कृषी कार्यालयात अर्ज केला होता. याचवेळी त्यांची भेट एजंट समाधान शेलारशी झाली. त्याने शेडनेटची मंजुरी आणि कर्ज मिळवून देण्याचे आश्वासन दिले.
शेलारच्या सांगण्यावरून पाटील यांनी युनियन बँकेत जाऊन काही कागदपत्रांवर अंगठा दिला. त्यानंतर शेडनेटसाठी सोनेवाडी (ता. शिंदखेडा) येथील कंपनीचे कामगार शेतात येऊन फक्त खांब उभारून गेले, मात्र शेडनेट प्रत्यक्षात बसवण्यात आलेच नाही.
कर्ज घेतल्याचे नोटीसमधून समजले
काही महिन्यांनंतर युनियन बँकेकडून नोटीस आल्यावर पाटीलना धक्का बसला. त्यांच्या शेतजमिनीवर बोजा ठेवून सात लाखांचे कर्ज त्यांच्या नावावर काढले असल्याचे समोर आले. व्याजासह ही रक्कम जवळपास अकरा लाखांपर्यंत वाढली आहे.
बँक रेकॉर्डनुसार कर्जाची रक्कम १८ फेब्रुवारी २०२० रोजी ‘ओम अ‍ॅग्रो सर्व्हिसेस, सोनेवाडी’ यांच्या खात्यावर वळती करण्यात आली होती. पोलिसांचा तपास सुरूया प्रकारानंतर अखेर अमळनेर पोलिस ठाण्यात फिर्याद दाखल झाली असून समाधान शेलार आणि उद्धव कुवर यांच्याविरुद्ध फसवणुकीचा गुन्हा नोंदवण्यात आला आहे. पुढील तपास पोलिस करत आहेत.
