यावल प्रतिनिधी : तालुक्यातील परसाडे बु. येथील साहिल तडवी (वय २२) या तरुणाने सोशल मीडियावर महापुरुषांविषयी आक्षेपार्ह पोस्ट टाकली. त्यामुळे दोन धर्मांमध्ये तणाव निर्माण होण्याची शक्यता असल्याने यावल पोलिसांनी बुधवारी रात्री गुन्हा दाखल करून त्याला अटक केली.
कमलेश शिके यांच्या फिर्यादीवरून दाखल गुन्ह्यानंतर पोलिसांनी त्याला ताब्यात घेतले. गुरुवारी न्यायालयाने त्याला २० सप्टेंबरपर्यंत दोन दिवसांची पोलिस कोठडी सुनावली. या प्रकरणाचा तपास उपनिरीक्षक अनिल महाजन करीत आहेत.दरम्यान, या घटनेच्या निषेधासाठी बजरंग दल कार्यकर्त्यांनी यावल पोलिस ठाण्यात निवेदन दिले. यात जिल्हा सहमंत्री राजेश्वर बारी, चेतन पाटील, युवराज बारी, अंकुश घारू, कापूर आदी उपस्थित होते.याशिवाय, भाजप पदाधिकाऱ्यांनीही पोलिस ठाणे व नायब तहसीलदार अतुल गांगुर्डे यांना निवेदन दिले. त्यात संबंधित तरुणाविरुद्ध देशद्रोही कृत्याचा गुन्हा दाखल करण्याची मागणी करण्यात आली. डॉ. कुंदन फेगडे, उमेश फेगडे, हेमराज फेगडे, नीलेश गडे, नितीन महाजन, भाजप शहराध्यक्ष राहुल बारी आदी या वेळी उपस्थित होते.
पोलिस निरीक्षक रंगनाथ धारबळे यांनी स्पष्ट केले की,
“धार्मिक भावना दुखावणाऱ्या किंवा वादग्रस्त पोस्ट टाकणाऱ्यांची गय केली जाणार नाही. सोशल मीडियावर पोलिसांचे लक्ष असून, कायदेशीर कारवाई अनिवार्य आहे.”
