यावल तालुका –फैजपूर शहरातील मौलाना अब्दुल कलाम आजाद हायस्कूल व ज्युनिअर कॉलेजकडे जाणारा मुख्य रस्ता अत्यंत दयनीय अवस्थेत असून त्याचा फटका थेट विद्यार्थ्यांना बसत आहे. या रस्त्याची तातडीने दुरुस्ती करण्याची मागणी शाळा प्रशासनासह स्थानिक नागरिकांनी केली आहे.
फैजपूर पोलिस स्टेशनपासून शाळेपर्यंतच्या मार्गावर मोठमोठे खड्डे पडले असून पावसाळ्यात या खड्ड्यांमध्ये पाणी साचल्याने वाहनचालक व पादचाऱ्यांना प्रवास करताना जीव मुठीत धरावा लागतो. शेकडो विद्यार्थी व शिक्षक दररोज या मार्गाने शाळेत ये-जा करतात. त्यामुळे सुरक्षिततेचा प्रश्न गंभीर बनला आहे.
शाळेच्या प्राचार्यांनी यापूर्वीही शासन व स्थानिक प्रशासनाकडे निवेदन देऊन रस्ता दुरुस्तीची मागणी केली होती. त्यांनी सांगितले की, “खड्डेमय रस्त्यामुळे अपघात होण्याचा धोका कायम आहे. विद्यार्थ्यांच्या शिक्षणावर त्याचा विपरित परिणाम होत आहे. त्यामुळे सार्वजनिक बांधकाम विभाग व स्थानिक प्रशासनाने तातडीने लक्ष घालावे.”
पालक व नागरिकांनीही विद्यार्थ्यांच्या हितासाठी प्रशासनाने तात्काळ पावले उचलून रस्त्याची दुरुस्ती करावी, अशी मागणी केली आहे. रस्त्याची झालेली दुर्दशा पाहता विद्यार्थ्यांच्या शैक्षणिक वाटचालीत अडथळे येऊ नयेत यासाठी लवकरच ठोस उपाययोजना होण्याची अपेक्षा व्यक्त होत आहे.
