पुणे : लग्नानंतर अवघ्या सहा महिन्यांतच पत्नी व सासूच्या त्रासाला कंटाळून एका तरुणाने गळफास घेऊन आत्महत्या केल्याची धक्कादायक घटना येरवडा परिसरात घडली. या प्रकरणी पोलिसांनी मृत तरुणाच्या पत्नी व तिच्या आईविरुद्ध आत्महत्येस प्रवृत्त केल्याचा गुन्हा दाखल केला आहे.
मृत तरुणाचे नाव अक्षय विजय साळवे (वय २६, रा. गणेशनगर, येरवडा) असे आहे. पत्नी दीपाली अक्षय साळवे (वय २४) व तिची आई संगीता अशोक अडागळे (रा. भगवाननगर, ता. गेवराई, जि. बीड) यांच्यावर गुन्हा नोंदविण्यात आला आहे.
या संदर्भात अक्षयची आई लक्ष्मी विजय साळवे (वय ५२) यांनी येरवडा पोलिस ठाण्यात फिर्याद दिली आहे.
पोलिसांच्या माहितीनुसार, विवाहानंतर दीपाली व तिची आई संगीता यांनी अक्षयवर आई-वडिलांपासून वेगळे राहण्याचा दबाव आणला. त्याचबरोबर त्याच्याविरोधात पोलिस ठाण्यात तक्रारीही दाखल केल्या. या सततच्या ताण-तणावाला कंटाळून अक्षयने १९ सप्टेंबर रोजी राहत्या घरात गळफास घेऊन आत्महत्या केली.
लक्ष्मी साळवे यांनी दिलेल्या फिर्यादीत, “पत्नी व सासूच्या सातत्याने होणाऱ्या त्रासामुळेच माझ्या मुलाने आत्महत्या केली,” असे नमूद केले आहे.
