रावेर तालुका – रावेर तालुक्यातील पाडळसे येथे २१ सप्टेंबर रोजी रात्री अज्ञात व्यक्तींनी ईदगाह परिसरातील संरक्षण खांब तोडल्याची घटना घडली. या प्रकारामुळे गावात धार्मिक तणाव निर्माण होण्याची भीती व्यक्त होत असून, समाज बांधवांनी संबंधित समाजकंटकांवर कठोर कारवाई करण्याची मागणी केली आहे.
पिडोदे रस्त्यालगत असलेल्या पाडळसे गावातील ईदगाह मैदानालगत गावातील तरुणांसाठी खेळाचे मैदान आहे. या मैदानावर सर्व जाती-धर्मातील युवक एकत्र येऊन खेळत असतात. मात्र, समाजात तेढ निर्माण करण्याच्या उद्देशाने अज्ञात व्यक्तींनी हे कृत्य केल्याचा आरोप करण्यात आला आहे.
समाज बांधवांचे म्हणणे आहे की, या घटनेमुळे गावात सामाजिक अशांती पसरविण्याचा प्रयत्न झाला आहे. त्यामुळे सदर घटनेची सखोल चौकशी करून आरोपींना शोधून काढावे व त्यांच्यावर गंभीर गुन्हे दाखल करून तात्काळ अटक करावी, अशी मागणी करण्यात आली आहे.
या संदर्भात समाज बांधवांनी फैजपूर पोलिसात निवेदन देऊन कायदेशीर कारवाई करण्याची मागणी केली आहे.
