यावल – ज.जि.म.वि.प्र.संचालित समाजाचे कला, वाणिज्य व विज्ञान महाविद्यालयात राष्ट्रीय सेवा योजनेच्या माध्यमातून ‘स्वच्छता सेवा पंधरवडा’ सुरू झाला आहे. या उपक्रमाचा एक भाग म्हणून दिनांक २२ सप्टेंबर २०२५, सोमवार रोजी महाविद्यालय परिसरात भव्य स्वच्छता मोहीम राबविण्यात आली. या मोहिमेत सुमारे १५० स्वयंसेवकांनी उत्साहपूर्ण सहभाग नोंदवला.
सकाळी ९ वाजता सुरू झालेल्या या मोहिमेत विद्यार्थ्यांनी हातात झाडू घेऊन परिसराची स्वच्छता केली. गोळा केलेला कचरा योग्य प्रकारे विल्हेवाट लावण्यात आला, ज्यामुळे महाविद्यालय परिसर स्वच्छ व सुंदर झाला.
या प्रसंगी प्राचार्य डॉ. एस.एम. सोनवणे आणि उपप्राचार्य प्रा. एम.डी. खैरनार उपस्थित होते. मार्गदर्शन करताना प्राचार्य डॉ. सोनवणे म्हणाले, “स्वच्छता ही केवळ परिसरापुरती मर्यादित नसून विचारांची आणि मनाचीही असावी. राष्ट्रीय सेवा योजना केवळ सामाजिक सेवा शिकवत नाही, तर जबाबदारी आणि शिस्तीचे महत्त्वदेखील शिकवते.”
या अभियानाचे नियोजन राष्ट्रीय सेवा योजनेचे कार्यक्रम अधिकारी प्रा. डॉ. पी.व्ही. पावरा व महिला कार्यक्रम अधिकारी प्रा. आर.एस. शिरसाठ यांनी केले. त्यांच्या नेतृत्वाखाली स्वयंसेवकांनी स्वच्छता मोहीम यशस्वीरीत्या पूर्ण केली.
या पंधरवड्यामुळे महाविद्यालयात स्वच्छतेबाबत सकारात्मक वातावरण व सामाजिक जाणीव निर्माण झाली आहे.
