मुंबई – महाराष्ट्र राज्याची फुटबॉल संघटना असलेल्या WIFA (वेस्टर्न इंडिया फुटबॉल असोसिएशन) तर्फे जळगाव जिल्हा फुटबॉल असोसिएशनचे सरचिटणीस फारुक शेख यांचा गौरव करण्यात आला. शनिवार, दि. २७ सप्टेंबर २०२५ रोजी मुंबईतील कूपरेज ग्राउंडच्या मीडिया हॉलमध्ये WIFA चे अध्यक्ष खासदार प्रफुल्ल पटेल यांच्या हस्ते त्यांना लॅपटॉप देऊन सन्मानित करण्यात आले.
या कार्यक्रमाला WIFA चे उपाध्यक्ष माजी मंत्री डॉ. विश्वनाथ कदम, माजी आमदार छत्रपती मालोतीराजे, खासदार श्रीकांत शिंदे, माजी आमदार सुनील धांडे, सचिव डॉ. प्रा. किरण चौगुले, कोषाध्यक्ष सलीम परकोटे आदी मान्यवर उपस्थित होते.
WIFA कडून राज्यातील सर्व जिल्हा संघटनांना फुटबॉल उपक्रमांसाठी ₹१,००,००० अनुदान देण्यात आले असून, डॉ. विश्वजित कदम यांनी वैयक्तिकरित्या ₹५०,००० ची मदत जाहीर केली.
पुरस्कार समारंभात २०२४/२५ हंगामातील उपविजेत्या संघांच्या कर्णधारांना फारुक शेख आणि अजगर पटेल यांच्या हस्ते गौरविण्यात आले.
वार्षिक सर्वसाधारण सभेत फारुक शेख यांनी खासदार क्रीडा महोत्सवात फुटबॉलचा समावेश करण्याची सूचना केली. सभागृहाच्या अध्यक्षांनी तात्काळ मान्यता घेत ठराव मंजूर केला आणि भारत सरकारच्या क्रीडा मंत्रालयाकडे प्रस्ताव पाठविण्याचे ठरले.
यासोबतच, जळगाव जिल्ह्याला २५ ते ३१ ऑक्टोबर २०२५ दरम्यान राज्यस्तरीय ज्युनियर मुलींच्या फुटबॉल स्पर्धेचे आयोजन करण्याची जबाबदारी सोपविण्यात आली आहे.
