यावल – दि. २८ सप्टेंबर २०२५ रोजी जळगाव जिल्हा मराठा विद्या प्रसारक सहकारी समाजाचे कला, वाणिज्य व विज्ञान महाविद्यालय, यावल येथे राष्ट्रीय सेवा योजना विभागाच्या वतीने शहीद भगतसिंग यांची जयंती साजरी करण्यात आली.
हा उपक्रम स्वच्छता पंधरवडा (१७ सप्टेंबर – २ ऑक्टोबर २०२५) तसेच रा.से.यो. दिन सप्ताह यांच्याशी जोडण्यात आला होता. कार्यक्रमाची सुरुवात उपप्राचार्य प्रा. एम.डी. खैरनार यांच्या हस्ते शहीद भगतसिंग यांच्या प्रतिमेस पुष्पांजली अर्पण करून झाली.
प्रमुख वक्ते प्रा. अक्षय सपकाळे यांनी भगतसिंग यांच्या आंदोलन चळवळीची माहिती देत त्यांच्या विचारांचे आजच्या पिढीसाठी असलेले महत्त्व स्पष्ट केले. युवकांनी त्यांचे आदर्श अनुकरण करण्याचे आवाहन त्यांनी केले. अध्यक्षीय भाषणात उपप्राचार्यांनी भगतसिंग यांच्या क्रांतिकारक भूमिकेवर व जीवनकार्यावर सविस्तर मार्गदर्शन केले.
या कार्यक्रमाला रा.से.यो. कार्यक्रम अधिकारी प्रा. डॉ. पी.व्ही. पावरा, महिला कार्यक्रमाधिकारी प्रा. रूपाली शिरसाठ, प्राध्यापकवृंद, शिक्षकेतर कर्मचारी व स्वयंसेवक मोठ्या संख्येने उपस्थित होते. कार्यक्रमाचे सूत्रसंचालन व आभारप्रदर्शन प्रा. रूपाली शिरसाठ यांनी केले.
या व्याख्यानातून विद्यार्थ्यांना देशभक्तीची प्रेरणा मिळाली.
