जामनेर – जामनेर शहरातील बोदवद रोड परिसरात आज सकाळी अवैधरित्या घरगुती गॅस वाहनात भरताना भीषण स्फोट झाला. या घटनेत एक मारुती ओमनी गाडी जळून खाक झाली असून एक व्यक्ती गंभीर जखमी झाला आहे. सुदैवाने गाडीत बसलेले इतर महिला-पुरुष बाहेर असल्याने मोठा जीवितहानीचा प्रसंग टळला.
स्फोट कसा घडला?
मिळालेल्या माहितीनुसार, भडगावला जाणारी मंडळी रेवती येथून जामनेरमार्गे प्रवास करत होती. बोदवद रस्त्यावर गाडीत अवैधरित्या गॅस भरण्याचे काम सुरू असताना अचानक सिलेंडरचा भडका उडाला. त्यानंतर जवळ ठेवलेल्या इतर सिलेंडरनाही आग लागली. क्षणातच गाडी ज्वाळांनी वेढली गेली. या घटनेत एक व्यक्ती भाजून गंभीर जखमी झाला असून त्याला तातडीने रुग्णालयात दाखल करण्यात आले आहे.
जामनेर शहरात घरगुती गॅसचा काळाबाजार मोठ्या प्रमाणावर सुरू असल्याचे उघड झाले आहे. बोदवद रोड, पाचोरा रोड, भुसावळ रोड परिसरात अवैध पद्धतीने वाहनांमध्ये गॅस भरण्याचे प्रकार सुरु असल्याचे नागरिक सांगतात. वारंवार तक्रारी करूनही पोलिस प्रशासनाकडून ठोस कारवाई होत नसल्याचा आरोप नागरिकांनी केला आहे.
या भीषण अपघातानंतर परिसरातील नागरिकांमध्ये प्रचंड संताप व्यक्त होत आहे.
