मुंबई – महाराष्ट्रातील २४७ नगरपरिषदा आणि १४७ नगरपंचायतींमधील (एकूण ३९४) नगराध्यक्ष पदांसाठी आरक्षण निश्चित करण्याची सोडत मंत्रालयात सोमवारी, ६ ऑक्टोबर २०२५ रोजी काढण्यात येणार आहे. मंत्रालयातील सहाव्या मजल्यावरील परिषद सभागृहात ही प्रक्रिया होईल.
आरक्षण (खुला, मागासवर्गीय, महिला आरक्षण इ.) निश्चित करण्यासाठी ही सोडत अत्यंत महत्त्वाची मानली जात आहे. या प्रक्रियेमुळे आगामी नगरपालिका आणि नगरपंचायत निवडणुकांसाठी इच्छुक उमेदवार आणि राजकीय पक्षांमध्ये उत्सुकता आणि धाकधूक वाढली आहे.
मंत्रालयाच्या सुरक्षिततेमुळे प्रत्येक राजकीय पक्षाला फक्त दोन प्रतिनिधींना उपस्थित राहण्याची परवानगी असेल. पक्षाचे अध्यक्ष किंवा सचिव यांनी याबाबत शिफारस करणे आवश्यक आहे. सोडतीपूर्वी उपस्थित प्रतिनिधींना आवश्यक सूचना दिल्या जातील.
नगर विकास विभागाच्या उपसचिव प्रियांका कुलकर्णी-छापवाले यांनी जारी केलेल्या पत्रानुसार, ही प्रक्रिया पूर्णपणे पारदर्शक व प्रशासकीय नियमांनुसार पार पडेल. अनेक दिवस प्रलंबित असलेली ही सोडत आता अंतिम टप्प्यात पोहोचली आहे. निकाल जाहीर होताच इच्छुक उमेदवारांच्या हालचालींना वेग येणार असून, आगामी निवडणुकांची तयारी अधिक गती घेणार आहे.
