जळगाव –जळगाव जिल्हा पोलीस दलाने गुन्हेगारीवर आळा घालण्यासाठी गुरुवारी (९ ऑक्टोबर) पहाटे मोठ्या प्रमाणात कोम्बिंग ऑपरेशन राबवले. या मोहिमेत विविध गंभीर गुन्ह्यांमध्ये सहभागी असलेल्या ८४ अट्टल गुन्हेगारांना पोलिसांनी ताब्यात घेतले आहे. संबंधित सर्व आरोपींवर प्रतिबंधात्मक आणि कायदेशीर कारवाई सुरू करण्यात आली आहे.
या मोहिमेमुळे शहरातील गुन्हेगारी विश्वात एकच खळबळ उडाली आहे. शहर, जिल्हापेठ, एमआयडीसी, जळगाव तालुका आणि रामानंदनगर पोलीस ठाण्यांच्या हद्दीत हे ऑपरेशन राबवण्यात आले.
अटकेत कोण होते?
हद्दपार, फरार, रेकॉर्डवरील गुन्हेगार, चोरटे, दारू विक्रेते अशा विविध प्रकारच्या आरोपींना पोलिसांनी गाठले. विनापरवानगी शहरात आलेल्या हद्दपार गुन्हेगारांवरही कठोर कारवाई सुरू आहे.
महेश्वर रेड्डी यांच्या मार्गदर्शनाखाली कारवाई
ही मोहीम पोलीस अधीक्षक महेश्वर रेड्डी यांच्या मार्गदर्शनाखाली पार पडली. अपर पोलीस अधीक्षक अशोक नखाते, विभागीय पोलीस अधिकारी नितीन गणापुरे, गुन्हे शाखेचे वरिष्ठ पोलीस निरीक्षक राहुल गायकवाड, तसेच शहरातील विविध पोलीस ठाण्यांचे अधिकारी आणि पथकांनी सक्रिय सहभाग घेतला.
जळगाव पोलीस दलाने गुन्हेगारांमध्ये भीती निर्माण करून शहरात शांतता व सुव्यवस्था राखण्यासाठी दिलेला हा संदेश स्पष्ट आहे — गुन्हेगारांना कुठेच आश्रय नाही!
