चोपडा – तापी नदीतून सुरू असलेल्या अवैध वाळू वाहतुकीवर नियंत्रण आणण्यासाठी महसूल विभागाने कारवाई केली असता, ग्राम महसूल अधिकारीवर जीवघेणा हल्ला करण्यात आला. ही धक्कादायक घटना रविवार, १२ ऑक्टोबर २०२५ रोजी सकाळी ६ वाजता घडली असून, हल्ल्यात अधिकारी गंभीर जखमी झाले आहेत.
ट्रॅक्टर चालक आणि मालकाने अधिकारी अनंत माळी यांना ट्रॅक्टरखाली ओढून फेकले, अशी माहिती समोर आली आहे. घटनेमुळे महसूल विभागात संताप आणि खळबळ उडाली आहे.
घटनेचा तपशील :
अमळनेर प्रांत अधिकाऱ्यांना तापी नदीच्या बुधगाव–जळोद परिसरात वाळू चोरी सुरू असल्याची माहिती मिळाली होती. त्यानुसार मंडळाधिकारी रवींद्र माळी यांच्या नेतृत्वाखाली ग्राम महसूल अधिकारी अनंत माळी, संतोष कोळी, सुधाकर महाजन, तिलेश पवार आणि भूषण पवार या पथकाने पहाटे ४ वाजता कारवाईसाठी मोर्चा वळवला.सकाळी ६ वाजता बुधगाव–जळोद पुलाजवळ तापी नदीपात्रात वाळू भरलेला ट्रॅक्टर दिसून आला. चौकशीदरम्यान चालकाने ट्रॅक्टरचा मालक अजय कोळी असल्याचे सांगून पळ काढला. ट्रॅक्टर जप्त करून चोपडा तहसील कार्यालयाकडे नेण्यात येत असताना, चालक विजय पावरा आणि मालक अजय कैलास कोळी (दोघेही रा. बुधगाव) यांनी रस्त्यात अडथळा निर्माण केला.
वाद वाढताच विजय पावरा याने अनंत माळी यांना कॉलर धरून खाली ओढले आणि जीवे मारण्याच्या हेतूने ट्रॅक्टरखाली फेकले. प्रसंगावधान राखून मंडळाधिकारी रवींद्र माळी यांनी त्यांना वाचवले, मात्र अधिकाऱ्यांच्या पाय व कमरेला गंभीर दुखापत झाली. आरोपींनी ट्रॅक्टरमधील वाळू ओतून घटनास्थळावरून पलायन केले.
गुन्हा दाखल जखमी अनंत माळी यांना चोपडा उपजिल्हा रुग्णालयात दाखल करण्यात आले आहे पुढील तपास सुरू असून आरोपींच्या अटकेसाठी पथक रवाना झाले आहे.
