जळगाव – राष्ट्रीय अन्न सुरक्षा व पोषण अभियानांतर्गत तृणधान्य सन 2025-26 या हंगामासाठी हरभरा व ज्वारी पिकांचे प्रमाणित बियाणे वितरण उपक्रम हाती घेण्यात आला आहे. शेतकऱ्यांना उच्च प्रतीचे बियाणे सवलतीच्या दरात उपलब्ध करून देण्यासाठी शासनाने हा उपक्रम सुरू केला आहे.
या योजनेअंतर्गत — 10 वर्षांआतील हरभरा बियाण्यांवर प्रतिकिलो ₹50 किंवा किमतीच्या 50% (जे कमी असेल तेवढे) अनुदान. 10 वर्षांवरील हरभरा बियाण्यांवर प्रतिकिलो ₹25 किंवा किमतीच्या 50% अनुदान. 10 वर्षांवरील ज्वारी बियाण्यांवर प्रतिकिलो ₹15 किंवा किमतीच्या 50% अनुदान लागू राहील.
ही प्रमाणित बियाणे महाबीज, कृभको, व राष्ट्रीय बियाणे निगम यांच्या अधिकृत वितरकांकडे उपलब्ध आहेत.
एकाच शेतकऱ्याला जास्तीत जास्त 2 हेक्टर क्षेत्रापुरतेच अनुदान देण्यात येईल.
शेतकऱ्यांनी या योजनेचा लाभ घ्यावा आणि अधिक माहितीसाठी संबंधित उपविभागीय कृषी अधिकारी किंवा तालुका कृषी अधिकारी कार्यालयाशी संपर्क साधावा, असे आवाहन कृषी उपसंचालक, जळगाव यांनी प्रसिद्धीपत्रकाद्वारे केले आहे.
