मुंबई – मुंबईतील काळाचौकी परिसरात आज सकाळी घडलेल्या धक्कादायक घटनेने सर्वत्र खळबळ उडाली आहे. एका तरुणाने प्रेमसंबंधातील वादातून तरुणीवर चाकूने वार करत स्वतःचाही गळा चिरून घेत आत्महत्या केली.
ही घटना आस्था नर्सिंग होम परिसरात घडली. हल्ल्यापासून बचाव करण्यासाठी तरुणी नर्सिंग होममध्ये पळाली, मात्र आरोपी तिच्या मागे गेला आणि तिथेच तिच्यावर चाकू हल्ला केला. त्यानंतर आरोपीने स्वतःचा गळा चिरून घेतला. या घटनेत आरोपीचा मृत्यू झाला असून तरुणी गंभीर जखमी आहे.
प्राथमिक माहितीनुसार, दोघांमध्ये प्रेमसंबंध होते, परंतु काही दिवसांपूर्वी त्यांच्यात वाद झाला होता. तरुणाला तरुणीच्या चारित्र्यावर संशय होता. याच संशयातून त्याने हल्ला केल्याची शक्यता व्यक्त केली जात आहे.
घटनास्थळापासून काहीच अंतरावर असलेल्या काळाचौकी पोलीस ठाण्यातील अधिकारी तत्काळ घटनास्थळी दाखल झाले. सध्या पोलीस या प्रकरणाचा तपास करत असून, जखमी तरुणीवर केईएम रुग्णालयात उपचार सुरू आहेत.
या घटनेमुळे मुंबईतील महिला सुरक्षेचा प्रश्न पुन्हा एकदा ऐरणीवर आला आहे.
