विमानतळावर परदेशी सिगारेट तस्करीचा मोठा प्रकार उघडकीस; दोन प्रवाशांना अटक

नागपूर – हरातील डॉ. बाबासाहेब आंबेडकर आंतरराष्ट्रीय विमानतळावर पहाटे परदेशी सिगारेट तस्करीचा आतापर्यंतचा सर्वात मोठा प्रकार उघडकीस आला. एअर अरेबियाच्या शारजाह-नागपूर विमानातून 650 पॅकेट्समध्ये सुमारे दीड लाख सिगारेट आणल्या गेल्या. या मालाची किंमत 12 लाख रुपयांहून अधिक असल्याचे सांगितले जाते. या प्रकरणात दोन प्रवाशांना अटक करण्यात आली असून त्यांची चौकशी सुरू आहे.
एअर अरेबियाची शारजाह-नागपूर फ्लाइट (जी9-415) रविवारी पहाटे 4:15 वाजता नागपूर विमानतळावर उतरली. प्रवासी बाहेर पडण्यापूर्वी सीमाशुल्क तपासणी दरम्यान दोन प्रवाशांच्या सामानात संशयास्पद वस्तू आढळल्या. पकडले गेलेले प्रवासी मोहम्मद जाकी आणि अब्दुल कादिर जहीर यांच्याजवळ एकूण सात पिशव्या सापडल्या. त्यात 650 पॅकेट्समध्ये सुमारे दीड लाख सिगारेट्स ठेवलेल्या होत्या. तपासाच्या दृष्टीने हा माल कुठे नेण्यात येणार होता हे अद्याप उघड करण्यात आलेले नाही. या सिगारेट्स ‘ईएसएसई स्पेशल गोल्ड’ ब्रँडच्या असल्याचे समजते. सध्या दोघांनाही चौकशीसाठी ताब्यात घेण्यात आले आहे. या घटनेमुळे असा प्रश्नही उपस्थित होत आहे की, एवढ्या संख्येत सिगारेट्स प्रवाशांनी बॅग आणि हँड बॅगमधून कशा आणल्या?
नागपूर विमानतळावर जप्त करण्यात आलेल्या सिगारेट्स कोरियन ब्रँडच्या असल्याचे समजते. प्रत्येक सिगारेटमध्ये सुमारे 3.5 मिग्रॅ टार, 0.4 ते 0.45 मिग्रॅ निकोटिन आणि 53 ते 55 टक्के तंबाखू असते. या सुपर स्लिम सिगारेट्सचे आकर्षक सुवर्ण पॅकेजिंग असते. सांगितले जाते की, या सिगारेट्सची ऑनलाइन विक्रीही केली जाते. मात्र, कितीही आकर्षक पॅकेजिंग असले तरी शरीरासाठी त्याचे दुष्परिणाम कमी होत नाहीत. तज्ज्ञांच्या मते, या प्रकारच्या सिगारेट्सचे सेवन करणारी व्यक्ती हळूहळू धूम्रपानाची सवय लावून घेते. परदेशी सिगारेट तस्करीमागे जास्त नफा मिळवण्याचा हेतू असतो. ‘ईएसएसई’ व्यतिरिक्त ‘गुडंग गरम’, ‘माँड’, ‘डनहील’ आणि ‘डेवीडॉफ’ या ब्रँड्सचीही तस्करी केली जाते. भारतातील जास्त कर आणि सीमाशुल्क टाळण्यासाठी अशी तस्करी केली जाते. कुरिअर सेवा आणि वैयक्तिक सामानाद्वारेही या सिगारेट्स एअर रूटने देशात आणल्या जातात. तरुणांप्रमाणेच अनेक महिला ग्राहकांमध्येही या सुपर स्लिम सिगारेट्सची मागणी वाढत आहे.