ग्वाल्हेर (म.प्र. )- मध्य प्रदेशात एक संतापजनक घटना समोर आली आहे. बस कंडक्टरने महिला प्रवाशाला बसमध्ये ओलीस ठेवत तिच्यावर बलात्कार केल्याची धक्कादायक माहिती समोर आली आहे. ग्वाल्हेर शहरात घडलेल्या या घटनेनंतर परिसरात खळबळ उडाली असून पोलिसांनी तत्काळ कारवाई करत आरोपीला बेड्या ठोकल्या आहेत.
मिळालेल्या माहितीनुसार, भिंड जिल्ह्यातील एका महिलेसोबत ही घटना घडली. महिला न्यायालयीन कामानिमित्त ग्वाल्हेर येथे आली होती. काम संपल्यानंतर ती शिवपुरीकडे जाणाऱ्या बसमध्ये चढली. प्रवासादरम्यान तिची ओळख बस कंडक्टर विष्णू ओझाशी झाली. कंडक्टरने भिंडपर्यंत सोडण्याचे आश्वासन दिले आणि तिचा मोबाईल नंबर घेतला.
संध्याकाळी त्याने तिला फोन करून ग्वाल्हेर बस स्टँडवर येण्यास सांगितले. ती बसमध्ये बसल्यानंतर प्रवासी उतरल्यावर कंडक्टरने बसचे दरवाजे बंद केले आणि तिच्यावर जबरदस्ती केली. या घटनेनंतर घाबरलेली महिला तातडीने पोलिस ठाण्यात दाखल झाली आणि तक्रार नोंदवली.
पोलिसांनी तक्रारीनंतर त्वरीत तपास सुरू करत अवघ्या काही तासांत आरोपी कंडक्टर विष्णू ओझाला अटक केली. आरोपी सध्या पोलिस कोठडीत असून त्याचा पूर्वइतिहास तपासला जात आहे. या प्रकरणानंतर ग्वाल्हेरमध्ये संतापाचे वातावरण निर्माण झाले आहे.
