मुंबई – ‘मुख्यमंत्री माझी लाडकी बहीण’ योजनेत पारदर्शकता आणण्यासाठी आणि लाभार्थ्यांना नियमितपणे आर्थिक मदत मिळावी यासाठी राज्य सरकारने https://ladakibahin.maharashtra.gov.in या संकेतस्थळावर ई-केवायसी (e-KYC) सुविधा सुरू केली आहे. ही प्रक्रिया 18 सप्टेंबरपासून दोन महिन्यांसाठी, म्हणजेच 18 नोव्हेंबरपर्यंत खुली राहणार आहे.
महिला व बालविकास मंत्री आदिती तटकरे यांनी सांगितले की, “ई-केवायसी प्रक्रिया अतिशय सोपी आणि सुलभ आहे. अनेक लाभार्थ्यांनी ही प्रक्रिया यशस्वीपणे पूर्ण केली असून, ज्यांनी अद्याप केली नाही त्यांनी ती लवकरात लवकर पूर्ण करावी,” असे आवाहन त्यांनी केले.
मंत्री तटकरे यांच्या अध्यक्षतेखाली मंत्रालयात झालेल्या बैठकीत या योजनेच्या लाभार्थ्यांना येणाऱ्या अडचणी आणि उपाययोजनांवर चर्चा करण्यात आली. त्या म्हणाल्या की, “ई-केवायसीद्वारे लाभार्थ्यांचे आधार प्रमाणीकरण केले जात आहे. ही प्रक्रिया महिला स्वतःच्या मोबाईलवरून काही मिनिटांत पूर्ण करू शकतात.”
या योजनेमुळे राज्यातील महिलांना आर्थिक बळ मिळत असून, शासनाने पारदर्शकतेसह थेट लाभ पोहोचविण्यासाठी ई-केवायसी प्रणाली प्रभावीपणे राबविली आहे.
