मुंबई – महाराष्ट्र राज्य माध्यमिक आणि उच्च माध्यमिक शिक्षण मंडळाने इयत्ता दहावी व बारावीच्या 2026 च्या परीक्षा वेळापत्रकाची घोषणा केली आहे. या वेळापत्रकानुसार, बारावीची लेखी परीक्षा 10 फेब्रुवारी ते 18 मार्च, तर दहावीची लेखी परीक्षा 20 फेब्रुवारी ते 18 मार्च 2026 दरम्यान होणार आहे.
बारावीच्या प्रायोगिक, श्रेणी, तोंडी आणि अंतर्गत मूल्यांकन परीक्षा 23 जानेवारी ते 9 फेब्रुवारीदरम्यान घेण्यात येतील. यामध्ये विज्ञान शाखेच्या प्रायोगिक, वाणिज्य शाखेतील प्रोजेक्ट मूल्यांकन आणि कला शाखेतील तोंडी परीक्षा समाविष्ट आहेत.
दहावीच्या प्रायोगिक, श्रेणी, तोंडी आणि अंतर्गत मूल्यांकन परीक्षा 2 फेब्रुवारी ते 18 फेब्रुवारी या कालावधीत पार पडतील. या काळात शारीरिक शिक्षण, आरोग्यशास्त्र, गृहशास्त्र आणि कला विषयांच्या मूल्यांकन परीक्षा शाळास्तरावर घेतल्या जाणार आहेत.
विद्यार्थ्यांनी या वेळापत्रकानुसार तयारी करून अभ्यासाचे नियोजन करावे, असे आवाहन शिक्षण मंडळाकडून करण्यात आले आहे. विषयवार वेळापत्रक व सूचना मंडळाच्या संकेतस्थळावर www.mahahsscboard.in येथे उपलब्ध आहेत, अशी माहिती मंडळाचे सचिव दीपक माळी यांनी दिली.
शुल्क व अर्ज सादरीकरणाची अंतिम मुदत:
इयत्ता दहावी व बारावीच्या परीक्षांसाठी पात्र विद्यार्थ्यांनी अर्ज क्रमांक 17 सादर करण्यासाठी लक्ष ठेवणे आवश्यक आहे.
अतिविलंब शुल्कासह अर्ज भरण्याचा कालावधी: 1 नोव्हेंबर ते 30 नोव्हेंबर 2025
अतिविलंब शुल्क: प्रति विद्यार्थी प्रति दिवस ₹20
नोंदणी पद्धत: पूर्णपणे ऑनलाइन
सर्व आवश्यक सूचना, माहितीपत्रक आणि मार्गदर्शक पुस्तिका मंडळाच्या संकेतस्थळावर उपलब्ध आहेत.
