पाचोरा – शिवसेना शिंदे गटाच्या निर्धार मेळाव्यात आमदार किशोर पाटील यांनी भाजपवर जोरदार निशाणा साधला. भाजपकडून बंडखोरांना पुन्हा पक्षात घेण्यात येत असल्याबद्दल त्यांनी टीकास्त्र सोडले.
“महायुतीच्या एका वर्षाच्या काळात आमदारांना एक फुटकी कवडीही मिळाली नाही,” असा टोला लगावत त्यांनी सरकारला घरचा आहेर दिला.
किशोर पाटील म्हणाले, “शिवसेनेच्या पाचही आमदारांनी ठरवलं, तर जळगाव जिल्हा परिषदेवर शिवसेनेचा अध्यक्ष बसवू शकतो. भाजपचे नेते युतीबद्दल बोलतात, पण हे कधी पलटी खातील सांगता येत नाही.”
ते पुढे म्हणाले, “चंद्रपूरच्या सभेत बावनकुळे म्हणाले होते, बंडखोरी केल्यास पाच वर्ष हकालपट्टी होईल. पण माझ्या मतदारसंघात बंडखोरी झाली, तरी कारवाई नाही. उलट त्या बंडखोरांना पद देऊन सन्मानित केले.”
शिंदेंचं कौतुक:
पाटील म्हणाले, “एकनाथ शिंदे यांनी ‘एक दिवसाचा मुख्यमंत्री’ चित्रपटातील नायकासारखं काम केलं. त्यांनी प्रत्येक भगिनीला दीड हजार रुपयांचं मानधन दिलं — ग्रामीण भागात त्याची किंमत माहिती आहे. शिंदे पुन्हा मुख्यमंत्री झाले असते, तर हे मानधन २१०० रुपये झाले असते. ते न झालं, हे दुर्दैव आहे.”
महायुतीवर प्रहार:
“महायुतीच्या वर्षभरात आमदारांना काहीच मिळालं नाही. आम्हाला फक्त पालकमंत्री गुलाबराव पाटील यांचाच आधार आहे,” असं ते म्हणाले. अतिवृष्टीमुळे मतदारसंघातील विकास ठप्प झाल्याचं सांगत त्यांनी जिल्हा नियोजन निधीतून किमान ५० टक्के निधी आपल्या मतदारसंघाला देण्याची मागणी केली.
“शिंदेंच्या काळात एक रुपयाचा पिकविमा होता; तो सुरू ठेवला असता तर शेतकऱ्यांना शासनाकडे हात पसरवावा लागला नसता,” असं म्हणत त्यांनी सरकारवर ताशेरे ओढले.
शेतकऱ्यांसाठी मागणी:
पाटील म्हणाले, “बच्चू कडू यांनी शेतकऱ्यांसाठी कर्जमाफीसाठी आंदोलन केलं, त्यांचं मी अभिनंदन करतो. मुख्यमंत्री आता ‘३० जूनची तारीख’ देऊ नका — तात्काळ शेतकऱ्यांची कर्जमाफी करा.”
