जळगाव – शहरालगत मोहाडी रस्त्यावर रामानंदनगर पोलिसांनी मध्यरात्री केलेल्या कारवाईत विनापरवाना वाळू वाहतूक करणारे एक डंपर पकडण्यात आले. या प्रकरणी चालक आणि वाहनमालकाविरुद्ध गुन्हा दाखल करण्यात आला असून, पुढील तपास सुरू आहे.
ही कारवाई मंगळवारी रात्री सुमारे साडेबारा वाजता करण्यात आली. नियमित गस्तीदरम्यान पोलिसांना संशयास्पदरीत्या फिरणारे डंपर (क्रमांक एमएच-१९ सीएक्स-२७६८) आढळले. थांबवून तपासणी केली असता, चालक शेख शाहरूख शेख निसार (रा. आव्हाणे) याच्याकडे वाळू वाहतुकीचा कोणताही वैध परवाना नव्हता.
पुढील तपासात हे डंपर अवैधरित्या वाळू वाहतूक करत असल्याचे स्पष्ट झाले. त्यानंतर पोलिसांनी डंपर आणि त्यावरील सुमारे तीन ब्रास वाळू जप्त केली. या प्रकरणी चालक शेख शाहरूख शेख निसार आणि वाहनमालक ललित रमेश चौधरी यांच्याविरुद्ध गुन्हा दाखल करण्यात आला असून, रामानंदनगर पोलिस ठाण्याचे पथक पुढील तपास करीत आहे.
