जळगाव – शहरातील कायदा आणि सुव्यवस्था अबाधित राखण्यासाठी पोलिसांकडून बुधवारी (दि. ५ नोव्हेंबर) रात्री विशेष ‘कॉम्बिंग ऑपरेशन’ राबविण्यात आले. या मोहिमेदरम्यान शनिपेठ पोलिसांनी हद्दपार आरोपीला गाठत ताब्यात घेण्यात यश मिळविले. या कारवाईमुळे गुन्हेगारी प्रवृत्तींमध्ये दडपण निर्माण झाले असून, पोलिस दलाच्या सतर्कतेचे पुन्हा एकदा प्रत्यंतर आले आहे.
अटक करण्यात आलेल्या आरोपीचे नाव तेजस दिलीप सोनवणे (वय २५, रा. कांचन नगर, जळगाव) असे आहे. हद्दपार असूनही तो शहरात वावरत असल्याची माहिती मिळताच शनिपेठ पोलिसांनी तातडीने कारवाई केली. बुधवारी रात्री उशिरा झालेल्या या विशेष मोहिमेदरम्यान सोनवणेला अटक करण्यात आली.
ही कारवाई पोलीस निरीक्षक कावेरी कमलाकर यांच्या मार्गदर्शनाखाली पार पडली. या मोहिमेत उपनिरीक्षक योगेश ढिकले, सहाय्यक फौजदार रघुनाथ पवार तसेच गुन्हे शोध पथकातील पोलीस हेडकॉन्स्टेबल अल्ताफ पठाण, योगेश जाधव, रवींद्र इंदाटे आणि कॉन्स्टेबल योगेश साबळे, निलेश घुगे, गजानन वाघ यांनी सक्रिय सहभाग नोंदविला.
