जळगाव – झटपट आणि मोठ्या रकमेचा नफा कमवण्याचे आमिष दाखवून जळगाव येथील एका महाविद्यालयीन लिपिकाला ३ लाख ६० हजार रुपयांची फसवणूक झाली आहे. ‘ऑनलाइन लाईक’ आणि ‘क्रिप्टोकरन्सी टास्क’च्या माध्यमातून ही फसवणूक केली गेली असून, या प्रकरणी अज्ञात सायबर भामट्यांविरुद्ध शनिपेठ पोलीस ठाण्यात गुन्हा दाखल करण्यात आलेला आहे.
शहरातील ज्ञानदेव नगर येथील रमेश सोनार (वय ४५) हे महाविद्यालयात क्लार्क म्हणून नोकरी करतात. ५ ऑक्टोबर रोजी त्यांना ‘टेलिग्राम’ ॲपवर एक संदेश प्राप्त झाला, ज्यात व्हिडिओ आणि फोटो लाईक केल्यावर प्रत्येक लाईकवर ₹१०० मिळतील, असे मोठे आमिष दाखवले गेले होते. सुरुवातीला ‘टास्क’ पूर्ण करून सोनार यांना ₹६६० मिळाले, ज्यामुळे त्यांचा विश्वास बसला.
त्यानंतर त्यांना बिटकॉइन आणि क्रिप्टोकरन्सीमध्ये गुंतवणूक करून मोठा नफा मिळवण्याचे ‘इकॉनॉमी टास्क’ पूर्ण करण्यास सांगितले गेले. सोनार यांनी या नफ्यामुळे आणखी मोठी गुंतवणूक केली आणि ₹२८ हजार रुपये भरल्यावर ₹४२ हजार मिळवण्याचे आश्वासन दिले गेले. यामुळे विश्वास ठेवून सोनार यांनी वेगवेगळ्या तारखांना आपल्या क्रेडिट कार्डांचा वापर करून ३ लाख ६० हजार रुपये विविध बँक खात्यांमध्ये हस्तांतरित केले.
८ ऑक्टोबर रोजी सोनार यांनी आपले ‘मिन्ट’ खाते तपासले आणि त्यात पैसे वाढण्याऐवजी ₹१.५ लाखांचा तोटा दिसला. फसवणूक झाल्याचे समजल्यावर त्यांनी तपासणी केली असता, ‘डेटा रिपेअर’ करण्यासाठी आणखी ₹१.५ लाख रुपये भरावे लागतील, असा संदेश मिळाला. त्यानंतर, सोनार यांनी तातडीने शनिपेठ पोलीस ठाण्यात तक्रार दाखल केली. ६ नोव्हेंबर रोजी या प्रकरणी अज्ञात सायबर भामट्यांविरुद्ध फसवणुकीचा गुन्हा दाखल करण्यात आला आहे.
