जळगाव – शहरातील मेहरुण तलावात शुक्रवारी (दि. ७ नोव्हेंबर) दुपारी तीन वाजता बुडून रामेश्वर कॉलनी येथील ४८ वर्षीय प्रकाश राजकमल कांबळे यांचा दुर्दैवी मृत्यू झाला.
मिळालेल्या माहितीनुसार, प्रकाश कांबळे हे मजुरी करून उपजीविका कमावत होते आणि शुक्रवारी दुपारी घराबाहेर पडले होते. काही वेळातच स्थानिक नागरिकांना मेहरुण तलावाच्या पाण्यात एका व्यक्तीचा मृतदेह तरंगताना दिसला. नागरिकांनी तात्काळ ही माहिती एमआयडीसी पोलिसांना दिली.
घटनेची माहिती मिळताच एमआयडीसी पोलीस तात्काळ घटनास्थळी पोहोचले. स्थानिक पोहणाऱ्यांच्या मदतीने प्रकाश कांबळे यांचा मृतदेह तलावातून बाहेर काढला गेला. मृतदेह जिल्हा शासकीय वैद्यकीय महाविद्यालय व रुग्णालयात आणण्यात आला, जिथे डॉक्टरांनी त्यांना मृत घोषित केले.
या घटनेनंतर रामेश्वर कॉलनी आणि मेहरुण तलाव परिसरात हळहळ व्यक्त केली जात आहे. प्रकाश कांबळे यांच्या पश्चात पत्नी, मुलगा आणि विवाहित मुलगी असा परिवार आहे.
एमआयडीसी पोलीस ठाण्यात अकस्मात मृत्यूची नोंद करण्यात आली असून, पोलीस पुढील तपास करत आहेत.
