उत्तर प्रदेशा – उत्तर प्रदेशातून एक धक्कादायक घटना समोर आली आहे. प्रतापगड जिल्ह्यातील फतनपूर पोलिस स्टेशन हद्दीतील नारायणपूर कला गावात ६ डिसेंबर रोजी घडलेल्या या घटनेने संपूर्ण परिसर हादरला आहे.
मिळालेल्या माहितीनुसार, मनोज (नाव बदललेले) आणि सनी (नाव बदललेले) हे दोघे बालपणीचे मित्र होते. मात्र काही दिवसांपूर्वी मनोजच्या गर्लफ्रेंडशी सनीने इंस्टाग्रामवर संवाद साधल्याने दोघांमध्ये वाद निर्माण झाला.
या वादातून संतापलेल्या मनोजने तीन मित्रांना सोबत घेतले आणि सूडाच्या भावनेतून सनीची हत्या करण्याचा कट रचला. शाळा सुटल्यानंतर त्यांनी सनीला गावाजवळील शेतात नेले आणि स्कार्फने गळा दाबून त्याचा जीव घेतला. त्यानंतर मृतदेह शेतात टाकून सर्व आरोपी फरार झाले.
रात्री उशिरापर्यंत सनी घरी न आल्याने त्याच्या वडिलांनी पोलिसांकडे तक्रार दाखल केली. दुसऱ्या दिवशी म्हणजेच ७ डिसेंबर रोजी सकाळी भातशेतीत सनीचा मृतदेह सापडला. पोलिसांनी घटनास्थळावरून मोबाईल, चेन, शाळेचा आयडी आणि हत्येसाठी वापरलेला स्कार्फ जप्त केला.
तपासाच्या दरम्यान पोलिसांनी मनोज आणि त्याच्या मित्रांना चौकशीसाठी ताब्यात घेतले. चौकशीत मनोजने गुन्ह्याची कबुली दिली आणि “माझ्या गर्लफ्रेंडशी बोलल्यामुळे मी त्याची हत्या केली,” असे सांगितले.
या घटनेनंतर परिसरात प्रचंड खळबळ उडाली असून पोलिसांनी मनोजला सुधारगृहात पाठवले आहे. गावात भीतीचे आणि तणावाचे वातावरण पसरले आहे.
