दिल्ली – दिल्लीतील लाल किल्ल्याजवळ झालेल्या भीषण स्फोटाने संपूर्ण देश हादरला आहे. तब्बल १४ वर्षांनंतर देशाची राजधानी पुन्हा एकदा स्फोटाच्या दहशतीने थरथरली. स्फोटानंतर दिल्लीसह देशातील सर्व प्रमुख शहरांमध्ये हाय अलर्ट जारी करण्यात आला असून, वाहनांची काटेकोर तपासणी आणि सीसीटीव्ही फूटेजचा बारकाईने आढावा घेतला जात आहे.
या स्फोटात १२ जणांचा मृत्यू झाला असून, अनेक जण जखमी झाले आहेत. प्राथमिक तपासात हा दहशतवादी हल्ला असल्याची शक्यता व्यक्त करण्यात येत आहे. पोलिसांच्या चौकशीत या घटनेचा पाकिस्तानशी तसेच फरिदाबाद दहशतवादी मॉड्यूलशी संबंध असल्याचे संकेत मिळत आहेत.
स्फोट होण्याच्या काही तास आधीच पोलिसांनी ३ डॉक्टरांसह एकूण ७ संशयितांना अटक केली होती. अटक केलेल्या संशयितांमध्ये डॉ. शाहीन शाहिद नावाची महिला डॉक्टरही आहे, जिने जैश-ए-मोहम्मद या दहशतवादी संघटनेशी संबंध असल्याचे उघड झाले आहे. तपासात असेही समोर आले आहे की, शाहीन ही जमात उल मोमिनत या जैशच्या महिला संघटनेची भारतातील प्रमुख म्हणून कार्यरत होती. तिचे उद्दिष्ट भारतातील महिलांची मोठ्या प्रमाणावर दहशतवादी संघटनांमध्ये भरती करणे हे होते.
पोलिसांच्या संयुक्त कारवाईत शाहीनच्या कारमधून एके-४७ रायफल आणि मोठ्या प्रमाणात साहित्य जप्त करण्यात आले. ती जिथे जायची, तिथे ही रायफल सोबत नेत असल्याची माहितीही समोर आली आहे. शाहीनसोबत अटक झालेल्या इतर संशयितांमध्ये फरीदाबादमध्ये राहणारा काश्मीरचा डॉक्टर मुझम्मिल गनी याचाही समावेश आहे.
या कारवाईदरम्यान २९०० किलो स्फोटके जप्त करण्यात आली आहेत. जम्मू-कश्मीर, उत्तर प्रदेश, हरियाणा पोलिस आणि केंद्रीय तपास यंत्रणांच्या संयुक्त मोहिमेत हे मोठे यश मिळाले असल्याचे अधिकारी सांगत आहेत.
स्फोटाची घटना सोमवारी संध्याकाळी ६.५५ वाजता लाल किल्ल्याजवळ घडली, जे ठिकाण अत्यंत गर्दीचे होते. स्फोट झालेल्या कारमध्ये बसलेला चौथा डॉक्टर मोहम्मद उमर याचाच मृत्यू झाल्याची प्राथमिक माहिती आहे.
सध्या दिल्ली पोलिस आणि राष्ट्रीय तपास संस्था (NIA) या संपूर्ण प्रकरणाचा सखोल तपास करत आहेत. देशभरात सुरक्षा यंत्रणा सतर्क आहेत.
