आगामी स्थानिक स्वराज्य संस्थांच्या निवडणुकीपूर्वी पश्चिम महाराष्ट्रात मोठी राजकीय घडामोड घडली आहे. राष्ट्रवादी काँग्रेस (शरद पवार गट) ला मोठा धक्का बसला असून, धाराशिव जिल्ह्यातील राष्ट्रवादीचे ज्येष्ठ नेते अशोक जगदाळे यांनी पक्षाला रामराम ठोकला आहे.
जगदाळे यांनी शेकडो पदाधिकारी आणि कार्यकर्त्यांसह काँग्रेस पक्षात प्रवेश केला आहे. मुंबईतील काँग्रेसचे मुख्यालय टिळक भवन येथे आज हा भव्य पक्षप्रवेश सोहळा पार पडला.
या कार्यक्रमाला काँग्रेस प्रदेशाध्यक्ष हर्षवर्धन सपकाळ आणि माजी मंत्री आमदार अमित देशमुख उपस्थित होते. त्यांच्या हस्ते अशोक जगदाळे आणि त्यांच्या समर्थकांचे पक्षात स्वागत करण्यात आले.
अशोक जगदाळे यांच्यासोबत नळदुर्गचे माजी नगराध्यक्ष नितीन कासार, माजी उपनगराध्यक्ष शरिफभाई शेख, माजी नगरसेवक अमृत भाऊ पुदाले, माजी नगरसेविका सुमनताई जाधव, तसेच संजय बेडगे, ताजोद्दीन सय्यद, रुक्नोदीन शेख, आलीम शेख, दत्ता राठोड, अमोल सुरवसे, नवलकुमार जाधव आणि माजी नगराध्यक्षा रेखाताई वसंत बागल यांच्यासह शेकडो कार्यकर्त्यांनी काँग्रेसमध्ये प्रवेश केला.
या पक्षप्रवेशामुळे धाराशिव जिल्ह्यात काँग्रेसची ताकद लक्षणीयरीत्या वाढली आहे. नव्या कार्यकर्त्यांचे स्वागत करताना हर्षवर्धन सपकाळ म्हणाले,
“काँग्रेस हा सर्व जाती-धर्मांना एकत्र घेऊन जाणारा पक्ष आहे. काँग्रेसचा विचार देशाला तारणारा आहे. राहुल गांधी यांच्या संघर्षावरचा विश्वास पुन्हा दृढ होत असून, राज्यात काँग्रेसचे चांगले दिवस परत येतील,” असे ते म्हणाले.
