अकोला – अकोल्यातील नागरिकांना अलीकडेच व्हॉट्सअॅपवर “अकोला महापालिकेचा लोगो” असलेला मेसेज येत आहे. या मेसेजमध्ये “फक्त १० रुपये भरून पाणी बिल अपडेट करा, नाहीतर पाइपलाइन तोडण्यात येईल” असा इशारा दिला जातो. मात्र, हा सायबर फसवणुकीचा प्रकार असून, अशा मेसेजला प्रतिसाद दिल्याने तिघांचे बँक खाते रिकामे झाले आहे.
१० रुपयांचा मेसेज, लाखोंचा तोटा
खदान पोलिस ठाण्याच्या हद्दीत ही फसवणूक घडली आहे.
या प्रकरणी सायबर पोलिस सेलकडे तक्रार दाखल करण्यात आली आहे.
सायबर गुन्हेगारांनी पाठवलेल्या मेसेजवर अकोला महापालिकेचा लोगो होता. मेसेजमध्ये लिहिलं होतं –
“तुमचं मागील महिन्याचं पाणीकर बिल भरलेलं नाही. त्यामुळे पाइपलाइन तोडण्यात येईल.”
यासोबतच ‘पाणीपुरवठा पाइपलाइन अधिकारी – देवेश जोशी’ या नावाने मोबाईल क्रमांकही देण्यात आला होता, ज्यामुळे मेसेज अधिक अधिकृत वाटावा असा प्रयत्न करण्यात आला.
रत्नाकला भगत यांचा अनुभव
पीडित महिला रत्नाकला भगत यांनी सांगितले की, त्यांना व्हॉट्सअॅपवर आलेल्या मेसेजमध्ये “मी लगेच बिल पाठवतो, पण आधी फक्त १० रुपये ऑनलाइन पाठवा” असे सांगण्यात आले.
महिलेने १० रुपये पाठवले, मात्र काही क्षणांतच दोन व्यवहार झाले —
पहिल्या व्यवहारात ₹65,663 आणि दुसऱ्या व्यवहारात ₹35,000 इतकी रक्कम गायब झाली.
म्हणजेच एकूण ₹1,07,000 रुपये त्यांच्या खात्यातून लंपास झाले.
याच पद्धतीने आणखी दोघांना फसवण्यात आलं असून, एकूण तीन नागरिक या सायबर गुन्ह्याचे बळी ठरले आहेत.
पोलिसांचे आवाहन
या प्रकारामुळे अकोल्यात खळबळ उडाली आहे.
खदान पोलिस ठाण्यात गुन्हा दाखल करण्यात आला असून, सायबर पोलिस या प्रकरणाचा तपास करत आहेत.
दरम्यान, नागरिकांनी अशा प्रकारच्या मेसेजवर विश्वास ठेवू नये, कोणतीही पेमेंट लिंक उघडू नये आणि संशयास्पद नंबरवर संपर्क साधू नये, असे आवाहन पोलिसांनी केले आहे.
सतर्क राहा – सायबर गुन्हेगार नव्या युक्त्या वापरत आहेत
महापालिका किंवा कोणतीही शासकीय संस्था व्हॉट्सअॅपद्वारे पेमेंट मागत नाही.
अशा बनावट लिंकवर क्लिक केल्यास तुमच्या मोबाईल व बँक खात्याची माहिती सायबर गुन्हेगारांकडे जाते.
त्यामुळे नागरिकांनी OTP, बँक माहिती किंवा पेमेंट लिंक कोणालाही देऊ नये.
