मुंबई – येऊ घातलेल्या मुंबई महानगरपालिका सार्वत्रिक निवडणुकीनंतर सभागृहात यंदा महिलांचे वर्चस्व दिसून येणार आहे. आरक्षणाच्या सोडतीत महिलांसाठी पुरुषांपेक्षा अधिक प्रभाग राखीव ठरल्याने आगामी मुंबई महापालिकेत “महिलाराज” पाहायला मिळेल, हे निश्चित झाले आहे.
महानगरपालिकेतील एकूण २२७ प्रभागांपैकी तब्बल ११४ प्रभाग महिलांसाठी राखीव ठरले आहेत, तर उर्वरित ११३ प्रभागांत पुरुष उमेदवारांना संधी मिळणार आहे. त्यामुळे आरक्षणातच महिलांची संख्या पुरुषांपेक्षा एकने जास्त आहे.
ओबीसीसाठी राखीव असलेल्या ६१ प्रभागांपैकी ३१, अनुसूचित जातीसाठी राखीव १५ प्रभागांपैकी ८, तसेच अनुसूचित जमातीसाठी राखीव २ प्रभागांपैकी १ प्रभाग महिलांसाठी राखीव ठेवण्यात आला आहे. खुल्या प्रवर्गातील १४९ प्रभागांपैकी तब्बल ७४ प्रभाग महिलांना देण्यात आले आहेत.
याशिवाय, काही खुल्या प्रवर्गातील प्रभागांमध्ये लोकाभिमुख कार्य करणाऱ्या महिलांना पक्षांकडून उमेदवारी मिळण्याची शक्यता अधिक आहे. प्रत्यक्ष प्रभागात उमेदवारी देताना महिला कार्यकर्तीच्या कार्याची जनसंपर्कातली परिणामकारकता लक्षात घेऊन निर्णय घेतला जातो. त्यामुळे येणाऱ्या महानगरपालिकेत महिला नगरसेविकांची संख्या पुरुषांपेक्षा अधिक असण्याची दाट शक्यता व्यक्त केली जात आहे.
मुंबई महापालिकेतील पुढील कार्यकाळात महिलांचा सहभाग वाढल्याने स्थानिक पातळीवरील निर्णय प्रक्रियेत महिलांचा प्रभाव अधिक जाणवेल, असा अंदाज व्यक्त केला जात आहे. आगामी महापालिकेत महिलांचं बळ निर्णायक ठरणार, हे आता निश्चित झालं आहे.
