डोंबिवली – परिसरात शनिवारी रात्री उशिरा धक्कादायक घटना घडली. मालवण किनारा हॉटेलसमोर किरकोळ धक्का लागल्याच्या वादातून एका तरुणाची निर्घृण हत्या करण्यात आली. मानपाडा पोलिसांनी अवघ्या ४८ तासांत शिताफीने कारवाई करत सर्व सहा आरोपींना अटक केली आहे.
मिळालेल्या माहितीनुसार, मृत तरुणाचे नाव आकाश सिंग असे असून तो नवी मुंबईतील एका कॉल सेंटरमध्ये काम करत होता. शनिवारी रात्री आकाश आणि आरोपी जेवणासाठी डोंबिवलीतील मालवण किनारा हॉटेलमध्ये आले होते. जेवण झाल्यानंतर बाहेर पडताना आकाशचा एका तरुणाशी किरकोळ धक्का लागला. या क्षुल्लक कारणावरून वाद निर्माण झाला आणि काही क्षणांतच तो हाणामारीत परिवर्तित झाला.
या हाणामारीदरम्यान सहा जणांनी आकाशवर धारदार शस्त्राने हल्ला करून त्याची हत्या केली. गंभीर जखमी अवस्थेत तो घटनास्थळीच मृत पावला. घटनेनंतर सर्व आरोपी पसार झाले होते.
मानपाडा पोलिसांनी तातडीने हत्या प्रकरणाची नोंद करून तपास सुरू केला. परिसरातील सीसीटीव्ही फुटेज तपासून आणि तांत्रिक पुरावे गोळा करून पोलिसांनी आरोपींचा माग काढला. त्यानंतर नाशिक, मालेगाव आणि चाळीसगाव परिसरात सापळे रचून पोलिसांनी सर्व आरोपींना अटक करण्यात यश मिळवले.
अटक करण्यात आलेल्या आरोपींची नावे अशी आहेत —
अमर राजेश महाजन (३६), अक्षयकुमार शंकर वागळे (२६), अतुल बाळु कांबळे (२४), निलेश मधुकर ठोसर (४२), प्रतिकसिंग प्रेमसिंग चौहान (२६) आणि लोकेश नितीन चौधरी (२४).
सर्व आरोपींना न्यायालयात हजर करण्यात आले असून पुढील तपास मानपाडा पोलिस करत आहेत. या घटनेने संपूर्ण डोंबिवलीत एकच खळबळ उडाली असून, पोलिसांनी केवळ ४८ तासांत सर्व आरोपींना अटक केल्यामुळे नागरिक आणि वरिष्ठांकडून पोलिसांच्या तातडीच्या कारवाईचे सर्वत्र कौतुक होत आहे.
