बुलडाणा – जिल्ह्यातील मेहकर तालुक्यातील नागापूर येथे शेतीच्या वादातून नातेवाईकांमध्ये तुंबळ हाणामारी झाल्याची धक्कादायक घटना घडली. या हाणामारीत एका व्यक्तीचा मृत्यू झाला असून आठ जण गंभीर जखमी झाले आहेत.
या घटनेनंतर डोणगाव पोलिस ठाण्यात दोन्ही गटांकडून परस्परविरोधी तक्रारी दाखल करण्यात आल्या आहेत. पोलिसांनी दोन्ही गटातील एकूण १८ जणांविरुद्ध गुन्हा नोंदवून तपास सुरू केला आहे. या प्रकरणात आतापर्यंत ९ जणांना अटक करण्यात आली आहे.
मिळालेल्या माहितीनुसार, शेतीच्या वादातून उद्भवलेल्या वादात सय्यद अय्याज सय्यद वाहेद यांचा मृत्यू झाला आहे. पहिली तक्रार विकार खां जाबीर खां पठाण यांनी दाखल केली असून त्यात दुसऱ्या गटातील ८ जणांविरुद्ध गुन्हा दाखल करण्यात आला आहे. तर दुसऱ्या गटातील सय्यद इमरान सय्यद रहीम यांनी सुद्धा तक्रार नोंदवून पहिल्या गटातील १० जणांविरुद्ध गुन्हा दाखल केला आहे.
या घटनेमुळे परिसरात तणावाचे वातावरण असून पोलिसांनी पुढील तपास सुरू केला आहे.
