इंदापूर – नगरपरिषदेच्या नगराध्यक्ष पदाच्या उमेदवारीवरून राष्ट्रवादी काँग्रेस (अजित पवार गट) मध्ये मोठा पेच निर्माण झाला आहे. या पार्श्वभूमीवर पुणे जिल्हाध्यक्ष प्रदीप गारटकर यांनी इंदापुरातून पक्ष नेतृत्वाला थेट इशारा दिला आहे — “पक्षाने आम्हाला कोललं तर आम्हीही कोलल्याशिवाय राहणार नाही.”
इंदापूर नगर परिषदेचे माजी उपनगराध्यक्ष भरत शहा यांना अजित पवार गटात घेऊन राष्ट्रवादीच्या चिन्हावर उमेदवारी देण्याच्या निर्णयाला गारटकर समर्थकांनी जोरदार विरोध दर्शवला आहे. या निर्णयावरून इंदापूरमध्ये राष्ट्रवादीत चांगलेच तापलेले वातावरण पाहायला मिळत आहे.
जर पक्षाने गारटकर समर्थकांच्या विरोधात निर्णय घेतला, तर प्रदीप गारटकर आपल्या पदाचा राजीनामा देऊन पक्ष सोडण्याची तयारी करत आहेत, अशी चर्चा रंगली आहे. पुण्यात उपमुख्यमंत्री अजित पवार आणि कृषिमंत्री दत्तात्रय भरणे यांच्यासोबत झालेल्या चर्चेनंतर गारटकर यांच्या निवासस्थानी कार्यकर्त्यांची महत्त्वाची बैठक पार पडली.
या बैठकीत गारटकर यांनी आपली ठाम भूमिका मांडत स्पष्ट इशारा दिला —
“जर पक्षाने आमचं ऐकलं, योग्य सन्मान ठेवला तर आम्ही घड्याळावर आहोत. पण पक्षाने जर आमच्यावर अन्याय केला, तर आम्ही सुद्धा पक्षाला कोलल्याशिवाय राहणार नाही.”
या वक्तव्यामुळे इंदापूर आणि पुणे जिल्ह्यातील राष्ट्रवादीच्या अंतर्गत राजकारणात मोठी खळबळ उडाली आहे.
