जळगाव – प्रवाशांना रिक्षामध्ये बसवून त्यांच्या खिशातील रोकड व मौल्यवान वस्तू चोरणाऱ्या दोन गुन्हेगारांना स्थानिक गुन्हे शाखेच्या पथकाने अटक केली आहे.
अटकेतील संशयितांची नावे वसीम कय्यूम खाटीक (वय ३३, रा. मास्टर कॉलनी) आणि तौसीफ सत्तार खान (वय ३६, रा. रामनगर) अशी आहेत. गुन्ह्यात वापरलेली रिक्षा पोलिसांनी जप्त केली असून, दोघांना पुढील चौकशीसाठी मध्य प्रदेशातील बऱ्हाणपूर पोलिसांच्या ताब्यात देण्यात आले आहे.
बऱ्हाणपूर शहरात रिक्षामध्ये प्रवाशांची फसवणूक करून खिसे कापण्याच्या घटनांवरून कोतवाली पोलिस ठाण्यात गुन्हा दाखल करण्यात आला होता. तपासादरम्यान जळगावातील रेकॉर्डवरील गुन्हेगार वसीम खाटीक व तौसीफ खान हे या चोरींमध्ये सामील असल्याची माहिती स्थानिक गुन्हे शाखेचे वरिष्ठ पोलिस निरीक्षक राहुल गायकवाड यांना मिळाली.
या माहितीच्या आधारे उपनिरीक्षक शरद बागल, सहाय्यक फौजदार अतुल वंजारी, अक्रम शेख, विजय पाटील, नितीन बाविस्कर, प्रवीण भालेराव, किशोर पाटील, रवींद्र कापडणे, राहुल रगडे, नाना तायडे आणि महेश सोमवंशी यांच्या पथकाने तत्काळ कारवाई करत संशयितांना ताब्यात घेतले. चौकशीत त्यांनी गुन्ह्याची कबुली दिली असून त्यांच्या साथीदारांचा शोध सुरू आहे.
या यशस्वी कारवाईबद्दल स्थानिक गुन्हे शाखेच्या पथकाचे जिल्हा पोलिस अधीक्षकांकडून कौतुक करण्यात आले आहे.
