पुणे – जिल्ह्यातील इंदापूर तालुक्यात एक धक्कादायक घटना घडली आहे. कळंब नीमसाखर रोडवर, एका हॉटेलपासून सुमारे ५०० ते ७०० मीटर अंतरावर, एका पुरुषाच्या डाव्या पायाचा अर्धा भाग आढळून आल्याने परिसरात खळबळ उडाली. बुधवारी सकाळी फिरायला गेलेल्या स्थानिकांना हा पाय दिसला आणि त्यांनी तत्काळ पोलिसांना माहिती दिली.
घटनेची माहिती मिळताच हाऊस ऑफिसर राजकुमार डुंगे आणि त्यांच्या पथकाने घटनास्थळी धाव घेतली. प्राथमिक तपासात हा तुटलेला पाय पुरुषाचा असल्याचे समोर आले असून, पायात मोजेही दिसून आले. हा पाय नेमका कुणाचा आहे आणि हा प्रकार कसा घडला, याची चौकशी पोलीस करत आहेत.
स्थानिक रहिवाशांनी या घटनेनंतर भीतीचे वातावरण निर्माण झाल्याचे सांगितले. पोलिसांनी मानवी अवयवाच्या स्रोताचा शोध सुरू केला असून, लवकरच अधिक माहिती समोर येण्याची शक्यता आहे.
