पाचोरा – पत्नी माहेरी गेल्यामुळे निर्माण झालेल्या मानसिक तणावातून नाचनखेडा (ता. पाचोरा) येथील ३७ वर्षीय तरुणाने विषारी औषध सेवन केल्याची दुर्दैवी घटना उघडकीस आली. उपचारादरम्यान त्याचा मृत्यू झाल्याची घटना आज सकाळी सातच्या सुमारास समोर आली असून, याप्रकरणी अकस्मात मृत्यूची नोंद करण्यात आली आहे.
मयताचे नाव समाधान संतोष पाटील (वय ३७) असे असून, ते प्लंबरचे काम करून आपल्या कुटुंबाचा उदरनिर्वाह करीत होते. काही दिवसांपूर्वी त्यांची पत्नी लहान मुलीसह माहेरी गेली होती आणि ती परत न आल्याने समाधान पाटील मोठ्या मानसिक तणावाखाली होते, अशी माहिती समोर आली आहे.
या तणावातूनच त्यांनी १२ नोव्हेंबर रोजी आपल्या राहत्या घरी विषारी औषध सेवन केले. प्रकृती बिघडल्यामुळे त्यांना तातडीने जळगाव येथील शासकीय रुग्णालयात दाखल करण्यात आले. मात्र दोन दिवस उपचार सुरू असताना त्यांचा मृत्यू झाला.
या प्रकरणी जळगाव जिल्हापेठ पोलीस ठाण्यात अकस्मात मृत्यूची नोंद करण्यात आली असून प्रदीप पाटील पुढील तपास करीत आहेत.
