जळगाव – जिल्ह्यातील 16 नगरपरिषद आणि 2 नगरपंचायतींच्या निवडणुकांमध्ये माघारीच्या शेवटच्या दिवशी उमेदवारांच्या मोठ्या हालचाली पाहायला मिळाल्या. त्यामुळे संपूर्ण जिल्ह्यातील निवडणूक लढतींचे अंतिम चित्र स्पष्ट झाले आहे. नगरसेवकपदासाठी तब्बल ५८२ आणि नगराध्यक्षपदासाठी ५४ उमेदवारांनी माघार घेतल्याने स्पर्धेची रंगत आणखी वाढली आहे. आता नगरसेवकपदासाठी १५५५, तर नगराध्यक्षपदासाठी ७७ उमेदवार मैदानात उरले आहेत.
भुसावळ–वरणगावमध्ये आठ-आठ उमेदवार; चुरस तीव्र
भुसावळ आणि वरणगाव येथे नगराध्यक्षपदासाठी प्रत्येकी आठ उमेदवार रिंगणात असल्याने या दोन्ही ठिकाणी तुफानी लढतीची चिन्हे स्पष्ट आहेत.
दुसरीकडे मुक्ताईनगर आणि पाचोरा येथे सरळ लढत असल्याने मतदारांचे लक्ष या दोन पालिकांकडे केंद्रीत झाले आहे.
२४६ प्रभाग, ४६४ जागांसाठी निवडणूक भुसावळ ‘अ’ वर्ग, अमळनेर, चाळीसगाव, चोपडा, जामनेर, पाचोरा ‘ब’ वर्ग, तर यावल, नशिराबाद, वरणगाव, पारोळा, भडगाव, धरणगाव, सावदा, रावेर, एरंडोल आणि फैजपूर या ‘क’ वर्ग नगरपरिषद म्हणून ओळखल्या जातात.
शेंदूर्णी आणि मुक्ताईनगर या नगरपंचायतींसह जिल्ह्यात एकूण २४६ प्रभागांतून ४६४ नगरसेवक पदांसाठी निवडणुका होत आहेत.
धरणगावात १०० उमेदवारांची माघार माघारीच्या पार्श्वभूमीवर सुरुवातीपासूनच पक्षांतर्गत समन्वयाची लगबग सुरू होती. शेवटच्या दिवशी धरणगाव येथे तब्बल १०० उमेदवारांनी माघार घेतल्याने राजकीय वातावरण ढवळून निघाले.
भुसावळमध्ये २५५ उमेदवार; जामनेरमध्ये नगराध्यक्ष बिनविरोध भुसावळ येथे माघारीनंतर सर्वाधिक २५५ उमेदवार रिंगणात राहिल्याने तेथील स्पर्धा अधिक तापणार आहे.
विशेष म्हणजे जामनेरमध्ये नगराध्यक्षपदासाठीच्या चारपैकी तीन उमेदवारांनी माघार घेतल्याने नगराध्यक्षपदाची निवड बिनविरोध झाली आहे.
प्रचारासाठी ३० नोव्हेंबरपर्यंत मुदत दिवसभर उमेदवार, कार्यकर्ते आणि पक्षनेत्यांच्या हालचालींनी जिल्ह्यात राजकीय तापमान चढले होते. निवडणूक चिन्ह वाटप व अंतिम उमेदवार यादी २६ नोव्हेंबर रोजी जाहीर होणार आहे.
प्रचारासाठी ३० नोव्हेंबरच्या मध्यरात्रीपर्यंत, तर सभा-मोर्चांसाठी रात्री दहा वाजेपर्यंत परवानगी असेल.
दोन डिसेंबरला मतदान, तीनला निकाल जिल्ह्यातील ८ लाख ८९ हजार ९१४ मतदार २ डिसेंबर रोजी ९७७ मतदान केंद्रांवर मतदान करतील. मतदानाची मोजणी आणि निकाल ३ डिसेंबर रोजी जाहीर होणार असून या निकालावरून जिल्ह्यातील स्थानिक स्वराज्य संस्थांचे भवितव्य निश्चित होणार आहे.
