जामनेर – नगरपरिषद निवडणुकीत नगराध्यक्षपदी मंत्री गिरीश महाजन यांच्या पत्नी साधना महाजन यांची बिनविरोध निवड यापूर्वीच पार पडली होती. त्यानंतर उमेदवारी अर्ज मागे घेण्याच्या अंतिम दिवशी, शुक्रवारी (दि. 21) भाजपचे आणखी नऊ उमेदवार बिनविरोध निवडून आले. मात्र या बिनविरोध निवडीमागे ‘साम-दाम-दंड-भेद’ नीतीचा वापर करण्यात आल्याचा, तसेच दबाव टाकून विरोधी उमेदवारांकडून अर्ज मागे घेतल्याचा गंभीर आरोप विरोधकांकडून करण्यात आला आहे.
अर्ज माघारीच्या दिवशी जामनेर नगरपरिषद क्षेत्रातील नऊ जागांवर प्रतिस्पर्धी उमेदवारांनी आपली उमेदवारी मागे घेतली. परंतु ही माघार स्वेच्छेने नसून, भाजपकडून मोठ्या प्रमाणावर दडपशाही करून घेण्यात आल्याचा विरोधकांचा ठाम दावा आहे.
रोहित पवारांचा महाजनांवर थेट हल्ला
या घडामोडींवरून राष्ट्रवादी काँग्रेस शरद पवार गटाचे आमदार रोहित पवार यांनी मंत्री गिरीश महाजन यांच्यावर जोरदार टीका केली आहे. एक्सवरील आपल्या पोस्टमध्ये त्यांनी म्हटले आहे :
“भाजपचे तथाकथित संकटमोचक गिरीश महाजन यांच्या जामनेरमध्ये वंचित आणि समविचारी पक्षांच्या उमेदवारांना सत्तेचा गैरवापर करून दबावाखाली अर्ज मागे घ्यायला भाग पाडले. हीच खरी बिनविरोध निवडणुकांची वस्तूस्थिती आहे. बिनविरोधसाठी एवढा अट्टहास का?”
ते पुढे म्हणतात :
“विकलेली यंत्रणा आणि निष्क्रिय निवडणूक आयोग काही बोलणार नाही; परंतु अशा दडपशाहीमुळे लोकशाही अखेरच्या घटका मोजत आहे का, याचा विचार जनतेने करायला हवा. लोकशाहीची हत्या करणाऱ्या अशा बेफाम मंत्र्यांचा राजीनामा मुख्यमंत्र्यांनी तत्काळ घ्यावा.”
रोहित पवार यांनी याला “गुंडांना जामीन, नेत्यांना जमीन आणि कुटुंबियांना नगरपरिषदेचे इनाम — भाजपची बिनविरोध कुटुंब कल्याण योजना” असे संबोधत गिरीश महाजन यांच्यावर कडाडून हल्ला चढवला आहे.
