जळगाव – यंदाच्या भुसावळ नगराध्यक्षपदाच्या निवडणुकीत रंगतदार परिस्थिती निर्माण झाली असून माघारीनंतर दहा उमेदवार रिंगणात कायम राहिल्यामुळे मतांचे मोठ्या प्रमाणात विभाजन होणार आहे. या परिस्थितीचा थेट फायदा भाजप उमेदवाराला होऊ शकतो, अशी शहरात जोरदार चर्चा आहे. माजी आमदारांसह शहरातील प्रभावी नेत्यांनी आखलेल्या राजकीय समीकरणांची दिशा अनुकूल असल्याचे दिसून येत आहे.
भाजपकडून रजनी संजय सावकारे मैदानात असून त्यांच्या विरोधात प्रमुख पक्षांचे उमेदवार तसेच पाच अपक्ष उमेदवार उतरल्याने दहा जणांमध्ये चुरस निर्माण झाली आहे. उमेदवारांची संख्या जास्त असल्यामुळे विरोधी मतांचे विभाजन प्रकर्षाने जाणवत आहे.
गेल्या निवडणुकीत अल्पसंख्याक मतांच्या विभागणीमुळे माजी आमदार संतोष चौधरी यांच्या मुलाचा पराभव झाला होता. यंदा त्या पार्श्वभूमीवर भाजपने आखलेली रणनीती अधिक काटेकोरपणे राबवली आहे. दरम्यान, राष्ट्रवादी काँग्रेस (अजित पवार गट) यांनी अल्पसंख्याक समाजातील अर्शिया अन्सारी यांना उमेदवारी दिल्याने अल्पसंख्याक मतांच्या एकवटण्याची शक्यता आणखी कमी झाल्याचे राजकीय वर्तुळात बोलले जात आहे.
