मुंबई – मुंबई महापालिका निवडणुकीच्या तोंडावर महायुतीमध्ये सारे काही आलबेल नसल्याच्या चर्चा सुरू झाल्या आहेत. अजित पवारांच्या नेतृत्त्वाखालील राष्ट्रवादी काँग्रेसनं मुंबईची कमान पुन्हा एकदा नवाब मलिक यांच्याकडे सोपवल्यामुळं भाजपानं विरोधाचा सूर आळवला आहे. “नवाब मलिक असतील तर आम्ही युतीत नाही,” अशी स्पष्ट भूमिका भाजपानं घेतल्यामुळं महायुतीत फूट पडण्याची शक्यता निर्माण झाली आहे. एकीकडे महाविकास आघाडीमध्ये काँग्रेसनं स्वबळाची घोषणा करून आघाडीला तडा दिला असताना, दुसरीकडे आता महायुतीतही नवाब मलिकांवरून दुभंग होण्याची शक्यता निर्माण झाली आहे.
आमची भूमिका ठाम
भाजपाच्या मुंबईतील बड्या नेत्यांनी नवाब मलिकांना युतीत सामावून घेण्यास ठाम नकार दिला आहे. मुंबई उपनगरचे पालकमंत्री तथा भाजपा नेते आशिष शेलार यांनी यासंबंधी खुलासा करताना म्हटलं की, “नवाब मलिक यांच्यावर अत्यंत गंभीर स्वरूपाचे आरोप आहेत. कोर्टानंही त्यासंबंधी निर्देश दिलेले आहेत. जोपर्यंत त्यांची या आरोपांतून पूर्णपणे निर्दोष मुक्तता होत नाही, तोपर्यंत आम्ही त्यांच्यासोबत कोणतेही व्यासपीठ शेअर करणार नाही. मुंबई महापालिकेच्या निवडणुकीत नवाब मलिक यांच्या नेतृत्वाखालील राष्ट्रवादीसोबत युती करणं, आम्हाला मान्य नाही. ही आमची ठाम भूमिका असून ती आम्ही पक्षश्रेष्ठींनाही कळवली आहे”, असंही त्यांनी सांगितलं.
नवाब मलिक असलेल्या कोणत्याही युतीत जाणार नाही
मुंबई भाजपाचे अध्यक्ष आमदार अमित साटम यांनीही नवाब मलिक यांच्याविषयी आक्रमक भूमिका घेतली आहे. ते म्हणाले, “नवाब मलिक यांच्या नेतृत्वात लढणारा कोणताही पक्ष आम्हाला मान्य नाही. त्यांच्यावर फार गंभीर आरोप आहेत. या आरोपांतून निर्दोष सुटका होईपर्यंत आम्ही नवाब मलिक असलेल्या कोणत्याही युतीत सहभागी होणार नाही. ही भाजपाची अधिकृत भूमिका आहे”, असंही त्यांनी स्पष्ट केले.
