मुक्ताईनगर – शहरात साखरपुड्याच्या वादातून २८ वर्षीय तरुणाची चाकूने भोसकून झालेल्या हत्येची धक्कादायक घटना उघडकीस आली आहे. या प्रकरणी मुक्ताईनगर पोलिसांनी दोन सख्या भावांना अटक केली असून शहरात मोठी खळबळ पसरली आहे. मृत तरुणाचे नाव विशाल गणेशगीर गोसावी (वय २८, रा. जिजाऊनगर, मुक्ताईनगर) असे आहे. नगरपंचायत निवडणुकीच्या वातावरणात ही घटना घडल्याने परिसरात भीतीचे सावट निर्माण झाले आहे.
विशाल गोसावी मागील दोन दिवसांपासून बेपत्ता होता. रविवार, २३ रोजी सायंकाळी हॉटेल वृंदावनसमोरील प्लॉटिंग भागातील मोकळ्या जागेत काही नागरिकांना त्याचा मृतदेह आढळला. तपासात त्याची चाकूने भोसकून हत्या झाल्याची खात्री पटली. नागरिकांनी तातडीने मुक्ताईनगर पोलिसांना माहिती दिली.
पोलिसांनी घटनास्थळी धाव घेऊन पंचनामा केला आणि मृतदेह शासकीय रुग्णालयात पाठवला. तपासादरम्यान ऋषिकेश आत्माराम पवार (धनगर) आणि आकाश आत्माराम पवार (धनगर) या दोघांना ताब्यात घेण्यात आले. आकाश पवार याचा एका तरुणीसोबत साखरपुडा झाला होता; मात्र त्या तरुणीचे विशाल गोसावी याच्याशी प्रेमसंबंध असल्याचा संशय त्याला होता.
या संशयातून आकाशने आपल्या भाऊ ऋषिकेशच्या मदतीने विशालची हत्या करण्याची योजना आखल्याचे तपासात उघड झाले. त्यांनी आधी विशालला दारू पाजली आणि त्यानंतर बोदवड रस्त्यालगतच्या बंद पडलेल्या उद्यानात नेऊन चाकूने भोसकून त्याची हत्या केली.
या प्रकरणी मुक्ताईनगर पोलीस स्टेशनमध्ये खुनाचा गुन्हा दाखल करण्यात आला असून दोन्ही आरोपींना अटक करण्यात आली आहे. पुढील तपास सुरू आहे.
