लातूर – जिल्ह्यातील रेणापूर नगरपंचायत निवडणुकीत शिवसेना (उद्धव बाळासाहेब ठाकरे गट)ला मोठा धक्का बसला आहे. पक्षाचे 16 पैकी तब्बल 11 उमेदवार निवडणुकीतून माघार घेत तटस्थ राहण्याचा निर्णय घेतला आहे. पक्षाकडून अपेक्षित सहकार्य न मिळाल्याचा आरोप करत या उमेदवारांनी नाराजी व्यक्त केली. शिवसेना नेते चंद्रकांत खैरे यांनी जोरदार लढाईचे आदेश दिले असतानाही, पक्षातीलच अडथळ्यांमुळे हा निर्णय घ्यावा लागल्याचे उमेदवारांचे म्हणणे आहे.
2016 मध्ये रेणापूर नगरपंचायत स्थापन झाल्यानंतर 2017 मध्ये पहिल्या निवडणुका झाल्या आणि भाजपाने एकहाती सत्ता मिळवली. यानंतर तीन वर्ष प्रशासकाचा काळ गेला. सध्याच्या निवडणुकीत भाजप, शिवसेना दोन्ही गट, काँग्रेस आणि राष्ट्रवादी काँग्रेस (शरद पवार गट) यांच्या चौरंगी लढतीने वातावरण तापले आहे. मात्र ठाकरे गटाच्या अकरा उमेदवारांनी माघार घेतल्याने राजकीय समीकरणे उलटली आहेत.
माघार घेणारे उमेदवार व प्रभाग
ललिता बंजारा – नगराध्यक्ष
अनुसया कोल्हे – प्र. 03
महेश व्यवहारे – प्र. 05
गोविंद सुरवसे – प्र. 06
रेखा शिंदे – प्र. 08
रेहानबी कुरेशी – प्र. 10
छाया आकनगीरे – प्र. 11
राजन हाके – प्र. 12
धोंडीराम चव्हाण – प्र. 13
शांताबाई चव्हाण – प्र. 14
बाबाराव ठावरे – प्र. 17
शिवसेनेला कमजोर करण्यामागे काँग्रेसचा डाव?
राजकीय वर्तुळात चर्चेला उधाण आले आहे की काँग्रेस नेते धीरज देशमुख यांनी भाजपविरोधात बलस्थान तयार करण्यासाठी शिवसेना (ठाकरे गट)ला जाणूनबुजून कमजोर केलं. शिवसेनेच्या 11 उमेदवारांना माघार घ्यायला प्रवृत्त केल्याचा आरोप विरोधकांकडून होत आहे. या घडामोडीमुळे ठाकरे गटाच्या निवडणूक मोहीमेवर परिणाम होण्याची शक्यता असून रेणापूरच्या चौरंगी लढतीत आता नवीन राजकीय अंकगणित तयार होणार आहे.
लातूरात युतीत बिघाड; सहकार मंत्री बाबासाहेब पाटील यांच्यावर भाजपाचा आरोप
दरम्यान, अहमदपूर नगरपरिषदेच्या निवडणुकीतही राजकीय तापमान वाढले आहे. जिल्ह्यातील भाजपाचे आमदार एकत्र येत असून सहकार मंत्री बाबासाहेब पाटील यांच्यावर ‘गद्दारी’चा आरोप केला जात आहे. नगरपालिका निवडणुकीत मंत्री पाटील यांनी सोबत सोडल्याचा आरोप करत भाजप आमदार संभाजी पाटील निलंगेकर यांनी, “गद्दारांना क्षमा नाही” असे कठोर वक्तव्य केले.
रेणापूरमधील अचानक घडलेल्या या निर्णयामुळे स्थानिक राजकारणात खळबळ उडाली असून आगामी निवडणूक निकालावर याचा मोठा प्रभाव पडण्याची शक्यता व्यक्त केली जात आहे.
