मुंबई – राज्य सरकारने भटक्या कुत्र्यांच्या वाढत्या समस्येवर नियंत्रण आणण्यासाठी सर्व महापालिका, नगरपालिका आणि नगरपंचायतींना कडक निर्देश जारी केले आहेत. सर्वोच्च न्यायालयाच्या मार्गदर्शक तत्वांच्या अनुषंगाने सरकारने नवीन परिपत्रक काढत शाळा-कॉलेज, रुग्णालये, बस-रेल्वे स्थानके या संवेदनशील परिसरात कुत्रे सोडण्यास स्पष्ट बंदी घातली आहे.
सरकारने स्थानिक स्वराज्य संस्थांना भटक्या कुत्र्यांना पकडून योग्य निवाऱ्याची व्यवस्था करण्याचे, तसेच त्यांच्यासाठी खाण्याच्या ठराविक जागा निश्चित करण्याचे आदेश दिले आहेत. याशिवाय, या निश्चित जागांव्यतिरिक्त कुठेही कुत्र्यांना खाद्य दिल्यास दंडात्मक कारवाई करण्याचे निर्देश देण्यात आले आहेत.
महत्त्वाचे निर्देश
-
संवेदनशील परिसरात (शाळा-रुग्णालय, बस-रेल्वे स्थानके) कुत्रे सोडू नयेत
-
भटक्या कुत्र्यांना पकडून सुरक्षित निवाऱ्याची व्यवस्था करावी
-
कुत्र्यांसाठी निश्चित खाद्य देण्याच्या जागा तयार कराव्यात
-
इतर ठिकाणी खाद्य दिल्यास दंडात्मक कारवाई करावी
-
भटक्या कुत्र्यांची तक्रार करण्यासाठी हेल्पलाईन क्रमांक सुरू करावा
-
कुत्र्यांचे निर्बीजीकरण, लसीकरण आणि जंतनिर्मूलन यांना गती द्यावी
राज्य सरकारने जारी केलेल्या या आदेशांमुळे शहरांमधील कुत्र्यांच्या वाढत्या त्रासावर काही प्रमाणात नियंत्रण येईल, अशी अपेक्षा व्यक्त केली जात आहे.
