चोपडा – अकुलखेडा परिसरात पहाटे भीषण अपघातात दहावीचा विद्यार्थी ठार तर त्याचा मित्र गंभीर जखमी झाल्याची घटना आज सोमवारी सकाळी ५.३० वाजता घडली. ट्युशनसाठी दुचाकीने चोपडा येथे जात असताना समोरून चुकीच्या दिशेने येणाऱ्या बसने जोरदार धडक दिल्याने हा अपघात झाला.
अपघातात मृत्यू झालेल्या विद्यार्थ्याचे नाव जय प्रदीप महाजन (वय १५, रा. अकुलखेडा) असे आहे. त्याचा मित्र नील हर्षल पाटील हा गंभीर जखमी झाला आहे.
अपघाताची सविस्तर माहिती
आज सकाळी दुचाकी क्रमांक एमएच १९ एयु ३०५८ वरून जय महाजन आणि नील पाटील हे दोघे चोपडा येथे ट्युशनसाठी जात होते. अकुलखेडा गावापासून अंदाजे दोन किलोमीटर अंतरावर समोरून चुकीच्या मार्गाने भरधाव वेगात येणाऱ्या बस क्रमांक एमएच १४ बीटी २०८३ ने दुचाकीला जबर धडक दिली.
या धडकेत दोघे विद्यार्थीही गंभीर जखमी झाले. तातडीने त्यांना जळगाव येथील शासकीय वैद्यकीय महाविद्यालय व रुग्णालयात (जीएमसी) उपचारासाठी नेण्यात आले. मात्र उपचार सुरू होण्यापूर्वीच जय महाजनचा मृत्यू झाल्याची माहिती डॉक्टरांनी दिली.
गंभीर जखमी नील पाटील याला पुढील उपचारासाठी जळगावच्या खाजगी रुग्णालयात हलवण्यात आले आहे.
या प्रकरणी रामानंदनगर पोलीस ठाण्यात अकस्मात मृत्यूची नोंद करण्यात आली असून, पुढील तपास सुरू आहे.
