मनमाड / नाशिक – राज्यातील स्थानिक स्वराज्य संस्थांच्या निवडणुकीची घोषणा होताच राजकीय घडामोडींना वेग आला आहे. येत्या २ डिसेंबरला नगरपरिषद व नगरपंचायतींच्या निवडणुका होत असून सर्वच पक्ष या निवडणुकांसाठी जोरदार तयारीला लागले आहेत. अशातच नाशिकच्या मनमाडमध्ये मोठी राजकीय हालचाल घडली असून भाजपला मोठा धक्का बसला आहे.
मिळालेल्या माहितीनुसार, भाजपचे अंदाजे ५० पदाधिकारी आणि निष्ठावान कार्यकर्त्यांनी पक्षाचा राजीनामा देत भाजपला ‘जय महाराष्ट्र’ केला आहे. निवडणुका जवळ आल्या असताना झालेल्या या घडामोडीमुळे राजकीय वर्तुळात खळबळ माजली आहे. पक्षातील दुर्लक्ष, अन्याय आणि निर्णय प्रक्रियेत होणाऱ्या एकतर्फी वागणुकीमुळे कार्यकर्ते नाराज असल्याची माहिती समोर आली आहे.
मनमाडमध्ये शिवसेना-भाजप युतीतून नाराजी वाढली
मनमाडमध्ये शिवसेना (शिंदे गट) आणि भाजप यांची स्थानिक युती झाली होती. भाजपला १५ ते २० जागांची अपेक्षा असताना केवळ चारच जागा मिळाल्याने कार्यकर्ते आणि पदाधिकाऱ्यांमध्ये नाराजी उफाळून आली. शिवसेनेतर्फे आमदार सुहास कांदे यांच्या नेतृत्वाखाली निवडणूक लढवली जाणार असून नगराध्यक्षपदाचा उमेदवारही शिवसेनेचाच असणार आहे. या पार्श्वभूमीमुळे भाजपच्या कार्यकर्त्यांमध्ये नाराजी आणखी वाढल्याचे समजते.
भाजप पदाधिकाऱ्यांचे गंभीर आरोप
काही भाजप पदाधिकाऱ्यांनी,
“भाजपला पूर्णपणे शिवसेना (शिंदे गटाच्या) खुंटीला बांधून ठेवण्याचा प्रयत्न सुरू आहे,”
असा थेट आरोप केला आहे. गेल्या २५ वर्षांत मनमाड नगरपरिषदेत भाजपचा एकही नगरसेवक विजयी न झाल्याने स्थानिक पातळीवरील नेतृत्वाचा अपयशाविरोधात कार्यकर्त्यांनी संताप व्यक्त केला आहे.
सामूहिक राजीनाम्यांची धडक
या सर्व घडामोडींच्या निषेधार्थ कार्यकर्त्यांनी जिल्हाध्यक्ष यतीन कदम यांच्याकडे सामूहिक राजीनामे सादर केले आहेत. त्यामुळे मनमाडमधील भाजपमधील अंतर्गत नाराजी आता उघड झाली असून निवडणुकीच्या उंबरठ्यावर झालेला हा धक्का भाजपसाठी मोठे आव्हान ठरणार आहे.
